Moord op een huisvrouw

Informatie genoemen bij mijn heere den Scholtet der Stadt van helmondt den xiijden Maij anno 1595, smorighens ten vijff uren in presentie Wolff Franck ende hanrick van Doernen Schepenen, oever den dooden lichaem van Elisabeth van Cranenbroeck, huijsvrouwe van hanrick janssen van vucht Soe is bevonden dat die zelve Elisabeth gehadt heeft in haere lichaeme twee swaere wonden, te weeten eenen diepen steeck onder haere slincker borste, diep ingaende omtrent een vierendeel van een elle, ende haer keele ofte stroete doergesnijden. Soe heeft den voerscreven Scholtet terstont het huijsgesin op hennen gerichtelijcken eeden, voer ons Schepenen voers. affgevraecht, hoe die voers. Elisabeth daer toe gecommen was, ende wie haer die voerscreven doetlijcke wonden gegeven hadde. Soe heeft Jenneken dochtere adolff pauwen out omtrent xviij jaeren, wesende die maecht van Elisabeth voers., op haeren eedt verclaerdt, als dat sij deponente op staende van haeren bedde, smorigens tusschen drie, ofte vier uren, doer het groet gescreije van het jonck kijndt van Elisabeth voerscreven, liggende het voerscrevenkijndt bij sijn vader op het bedde ende op siende, soe sij deponente die achter doere vanden huijse open vonden staende, waer om verwondert wesende, is buijten die doere opte platze gegaen, ende daer commende heeft haer vrouwe Elisabeth voerscreven doet vinden ligghen vande twee swaere quetssueren, ende daer bij gevonden haer messe, daert met gedaen was, zoe het scheen. Ende zeer verscrickt wesende, heeft sij deponente zeer swaerlick op gecrist ende op geroepen, om bijstant