de werelt is soo boos, zij steckt vol valsche kecken
die deuchdelijcken leeft, daer sietmen meest me' gecken
alsoo't ghebleken heeft,, ouer een corte wijl
dat cupido zeer fier, recht schoot met eenen pijl
iuyst in een paepkens hert, dattet begonst te vunken
die t'scheen te sijn vol-maeckt, alsoo hy sich liet duncken
hij had' altijt ghepreckt,, de geusen sijn verdoemt
ia in zijn bicht ghekeckt,, en menich-mael beroemt
ghij meijskens draeght de hel, segh-ick onder v rocken
daer de duijvel, eer langh', noch sal zijn pap in brocken
ten lesten ist gheschiet, zoo t'paepken zelf seij daer
heer-oom die creech de muts, syn prophecij' wert waer
hij hadde voor sijn maert, een zeer schoon boer-inneken
die hij doen op dat pas, socht voor sijn vrindinneken
wat mach v ouer-gaen, wat wildij doen sprack zij
mijn eerweirdichste heer, hout v toch wijslijck ghij
hebt ons altijt gheleert, ghepreckt, in goeij sermoonen
dat inden hemel sal, niemant dan maeghden woonen
daer door ben ick van zin, te worden een boghijn
ick draegh' alreet den keel, t'beginsel vanden schijn
sus zijt te vree, schoon lief, en wilt hierom niet vreesen
ick vangh' met sulcken net, alle de simpel meesen
d'een compt inde coord', en d'ander inde crans
hier me' cryghen wij t'goet, van vrouwen ende mans
heeroom heeftse becout, dat sij voor hem ginck nyghen
en maeckten hem zoo moe, dat hij begonst te hijghen
dit spel had' langh gheduert, tot dat sij wert bevrucht
heer-om die wert benout, hij liet-doen eenen sucht
grietken ick weet v raet,, sprack hy, en was beladen
neempt hier tot uwer baet,, een ionck man vroom van daden
hier is geuken ghoet bloet, die v ter eeren vrijdt
ick sallen gheuen v, dat hij sich daer me' lijdt
aldus wert sij de bruijt, binnen twee oft drij daghen
doen geuken was ghetrout, hy quam t'mijn heeroom claghen
het sanderdaeghs zeer vroech,, hoe dat sijn vrou was vol
heer-oom die seij, en loegh,, wat leijt mij aen die tol
elck moet syn auontuer, inden houwelijck verwachten
ten baet gheweent, ghetreurt, al doedij hier v clachten
v aensicht is gheschent, snijdij af uwen neus
elck moet verdraghen dit, al sijdij paeps, oft geus
hier mede ginck hij t'huijs, soo wijs, als hij was comen
hij moesten zijn te vre', met die hij had' ghenomen
wat dinckt v van dit spel, t'was eenen loosen vont
alsoo te stellen wt, sijn maert met t'kint terstont