HUAcursus tekst 13

Caput  Van den dobbelen Int jaer ons heren 1382 des woensdaghes  na Zinte Pouwelsdach in den afterwinter overdroech  die raet van der stat out ende nywe waer  yemant die in der stat ofte in der statvrijhede  woenaftich waer die dobbelde binnen der stat ofte op  ene mile na der stad die zel ene maent lang uter  stat wezen ofte der stat gheven te beteringhe 5000  steens. Ende die weert in wes herberghe dat men dobbelde  die zel twe maende uter stat wezen jofte gheven  der stat 10.000 steens. Ende hier zel die raet van der stat vier manne  toe zetten uten rade die dit verwaren zellen ende tfolc  bekoeren bi horen ede. Ende zi zellen weder hebben van  elken persoen die zi bekoeren een duzent steens. Ende zo wye deze coeren verboeren die zelse  brenghen opter stat kiste alse die raet  opter stathuys zit. Ende waert dat die ghene die  van der stat raet tot dezen zaken ghezet warden  dit verzumeden dat deze voerseyde coeren opter stat  kiste nyet en quamen alse voerscreven is, die zel een  maent lang uter stat rade wezen ende deze over- drachte voerscreven zel dueren tot wedersegghen des  raets vander stat out ende nywe of te verlenghen  van termine tot terminen also langhe ende also dicke  alse zi willen.