De miraculeuze madonna van Kortrijk

Jan van Neste filius Jans gheseijt hovenier meester metsenaer van stijle ende calck brandende buijten de Bisseghem poorte deser stede oudt lxvi jaeren verclaert bij eede dat hij inde maent van september 1636, met zijn huijsvrauwe savonts ghenomen hebbende het avontmael, is met haer ghegaen te ruste, alswanneer hij op het bedde wezende ontrent ten neghen uren voor dat hij in slaepe ghevallen is, heeft met vulle verstant ghezien voor zijn bedde staen een zeer lelick monster al zwart, twelck ziende zeijde, gaet van mij ghij boosen, ende zijn vuijst nemende heeft naer het monster ghesleghen, ende zijn huisvrauwe poghe doende om ghewijt water te nemen heeft den slach ghevat, waer door t'ghewijt water is ter aerden ghestort, maer zoo zij danof niet ghequetst en was, heeft opghestaen om te haelen het water twelck zij hadde ghehaelt uutte kercke van t'Clooster van Groeninghe twelck ghewijt was ter eeren van Onse Lieve Vrauwe in Groeninghe mette heilighe kersse van Atrecht, van welck water zij gaf een deel te drincken aenden attestant, twelcke ghedroncken hebbende ende zijn huisvrauwe ghegaen zijnde om vier te slaen heeft hij attestant ghezien aen het voethende van zijn coutse Onse Lieve Vrauwe al int witte met claerheijt, haer hair wesende als goudt met een cleen croonken op haer hooft ende een scherp neuseken, wit schoon ende rondt van aenzichte, de welcke anschauwende heeft terstont overluijt gheropen, ick zie Maria ick zie Maria, ende wiert zoo overghoten van tranen door blijtschap dat de zelve afliepen te kinne nederwaerts, zoo zaen zijn huisvrauwe t'licht brochte is Onse Lieve Vrauwe van hem verdwenen, zedert welcken tijt hij noint ghequollen en is gheweest van eenighe vervolghinghe ofte monsters, belovende dese zijne attestatie te ratificeren voor alle jugen dies verzocht zijnde, de welcke hij naer lecture heeft gheteeckent desen xiien oust xvic veertich onder staet zeker mercq ghecircumscribeert Jan van Neste