Anno XVC XVII opten XXIIIen dach Novembris heeft Adriaen
Jan Reyns gehuert tegen Lijsbetten Dries Wouter Jennekens
wedue met Jannes Stevens zijnen heeren voight de stede die
Lijsbeth voirsz. in tochten besittet, eenen termijn van XII
jaeren sonder middelt vervolghende aengaende tot half Meert
naestcommende ende ten ierste VI jaeren elcken zijn berouwe
elcx jaers om den commer die daer uutgaet, te weten
twee zester rogs sjaers ende Lijsbette daer schadeloos aff
houden, ende om vijfthalven gulden X stuyvers rogs .. Lijsbetten
voirsz. in de hant verschijnende tot Bamisse ende oft gebeurde
dat Lijsbeth binnen den voirsz. huertijde afflijvich warde
ende de erfgenamen van Driese wouden Jennekens voirsz. den voirgenoemden
Adriaen affsetten wouden van der voirsz. steden, soe sal
hij van dien jaere volstaen metten twee zesten rogs te betalen
ende ongehouden zijn van den voirsz. vijfthalven gulden ende
off de erfgenamen voirsz. zijn huere hem laten volghen, zoe sal
Adriaen voirsz. denselven erfgenamen jaerlijcx betalen ghelijck
hij Lijsbetten voirsz. gelooft heeft, alzoe lange als die huere
gedueren sal, item Adriaen voirsz. sal elcx jaers beter opte
huysingen doen decken vier mandelen rechts stroos
oft ten twee jaren acht mandelen sonder Lijsbette cost
Item Adriaen voirsz. sal int affscheiden tlant laten alzoe
hij dat aenveerden sal, ende oec de huysingen en wanden
op lenen alzoe hij die aenveerden sall, ende om Lijsbetten
voirsz. te bet te versekeren, zoe heeft Dierick Cornelis Rombouts
zone voir Adriaen gheloeft als borghe als voir de jaer-
lijcsche huere, Item Lijsbette voirsz. sal .. dat zij niet
en versaeyt opt goet laten ende Adriaen sal .. int
affscheiden daer ooc op laten, actum in presentien Jans
van der Wijmaeren ende Merten Godens als getuyghen.
Hans Van Landschoot
zei op donderdag 12 oktober 2023 - 09:35