Ik heb een aantal dingen kunnen verbeteren of aanvullen, helaas niet alles.
Is to wetene soe t'wijst schelinge ende gebreken geweest sijn tusschen die eirwerdiger ende eirbairre vrouwe Berta
van Keppell, vrouw ther Honnep vanwegen zaliger Henricken suster then Marsch an eyne. Inde Gerit Muylart
volmechtich sijnre moeder zijns broeders ende Everts van Langen an die andre zijden herkomende van sodane erve
ende vesterffguet als zelige Henrick then Marsch op den dach hij levendich ende doit was achter gelaten heefft, nyet
dair van uutgescheiden. Soe hebben die vrunden van wegen die vrouwen ende joffrouwen then Marsch vurschr. mit
namen Derick van Dorth ende Garzelis? van Scharpenzeell. Inde van wegen Gerits voir hem ende volmechtich der
andere vurschr. Jacop van Hackfoirden, drossait van Zallant ende Henrick Wullynck. Inde Herman van Wije,
Wilhem Leerynck ende Arnt Berck (bestuurders van Zutphen) als gelijcke averluyde van beyden zijden vuirschr. daertoe gebeden ende onthaeldt
eyn vruntlick ende mijnlick gescheit ende uutspraick mit oirre beyder wille ende consent ghedingt averdragen ende
gemackt in manieren ende vurwerden hyrna beschreven, in den yrsten sullen die vrouw van die Honnop ende joffvrouw
then Marsch vurschr. erfflick avergeven Gerit Muylart volmechtich die ander vurschr. alsodane erve ende ver-
sterffguet heth wi leene t'ewigen thijns ende alle ander guet, rede ende onrede, nyet uutgescheiden als zelige
Henrick vurschr. op den dach hij levendich ende doit was achtergelaten heefft. Beheltlick wes die vrouw van den
Honnop off joffrouw then Marsch off yemant van oirre wegen voir desen daige van den vurschr. versterfguet
geboirt mogen hebben. Dat sullen zij beholden. Hyrentegen soe sall Gerit Muylart mijnen vrouwen inde die
joffrouwen then Marsch vurschr. bynnen Zutphen wijsheit ende geloeve setten daer zij mede bewaert sullen wesen
then rechten. Dat zij ende oir cloister off yemant anders van oirre wegen onbelast wesen ende blijven sullen. heth
were van ware burschap, testament, scholt off enigen anderen saicken, nyet uutgescheiden, dat den vurschr. versterff
berueren mach. Inde die vrouwen van den Honnop ende joffrouw then Marsch vurscr. wair burgeren sullen vrij ende
qwijt wesen van den voirsanck zij gedaen hebben. Hyrtoe soe sall Gerit volmechtich vurschr. die joffrouwen then
Marsch vesten ende vast maicken tot oren lijve, daer zij mede bewairt sall wesen bynnen Zutphen twyntich
golden Rijnsche gulden off payemente an golde, den golden gulden gelijk guet jairlix to vorne soe lange zij leefft und
nyet langer. Angaende op sinte Peter ad Cathedram verleden dair die yrste termijne van wesen sal op sinte Peter
ad Cathedram in den jair van LXXXIII (1483) nees tokomende. Inde soe voirt soe lange zij leefft ende nyet langer. Noch sall
Gerit vurschr. der selver joffer then Marsch tot behoiff dess cloisters thoe Honnop vurschr. bynnen Zutphen uutwijssen-
veste ende vast maicken vijffhondert golden Rijns gulden off die werde an anderen golden payemente die Gerit
vurschr. betalen sall bynnen desen neesten tokomende vier jaeren sonder enige renthe bynnen den vier jaeren to gheven. Ende off
Gerit vurschr. thendens den vier jaeren dit langer verholden wolde, dat mach hij doen voir die renthe van twytich
penningen eyns twee jair lanck dair van to gheven. Ende thendens den tween jaeren sall Gerit die vurschr. vijffhondert
golden Rh. gulden off die werde miten achtstediger onbetaelde renthe opleggen ende betalen. T'welck nu op sinte Peter ad
Cathedram verleden yrst angaen sall. Oick sall Gerit vurschr. mijnen vrouwen ende die joffrouwen then Marsch vurschr.
tusschen dit ende sinte Johan to midzomer naetokomende rede gheven off affdoen hondert golden Rh. gulden mitten penningen
daerop verschenen na inholt der brieve dairvan wesende, herkomende van brieven ende kwytancien die zelige Henrick
then Marsch antreffte ende affhendich gemackt werd. Die welcke men Gerit Muylert vurschr. ??... ende lenen sall. Mede
soe sall Gerit volmechtich vurschr. to vreden stellen heer Aelbert Luysman van testament ende Johan van Griet van testament
ende scholt na vermogen eyns brieffs dair Metken then Marsch mede in besprecht is die mijn vrouw vurschr. dair
van gegeven heefft. Want mijn vrouw dat gegheven moist, solde zij totten kwytancien ende brieven die verbijstert weren
konnen. Soe als zelige Henrick then Marsch eyn vierde man was tot gyffte eynen vicarien op die Nye Stat gelegen. Dair (Nieuwstad is een straat in Zutphen)
hie Aelbert Luysman thant besitter van is. Ind Henrick vurschr. bij sijnen levendige lijve sijn deell avergegheven heefft Evert
then Voirst. Alsoe dat Evert ende sijne erven dair van erfflick ende ewelick soe well hon dat vernyede gyfften
wesen ende blijven sall. Dairaff sall Gerit Evert vurschr. brieve gheven in die bester formen. Dit sullen zij to beyden
zijden malckanderen voltrecker brieve omme brieve gheven, dair zij to beyden zijden mede bewairt sullen wesen tusschen
dit ende pinxstren nees tokomende, bij eynre penen (poene/boete) duesent olde schilden, halff tot behoyff mijns genedigen
lieve heer. Inde die ander helffte tot behoiff der holdenre parthyen. Welcke vurschr. vurwerden ende pene beyde parthyen
vurschr. gerichtlicken voir Arnt Beerk ende Arnt Huyerynck scepenen to Zutphen bekant ende avergeven hebben.
Inde were saick dat hyr inne nu off in tokomende tijden enich gebreck opstonde, die sullen altijt stain tot
onss segsluyde ende avermannen vurschr. kleringe. Dese zedulen sijn drie alleens holdenen, die elck parthie eyner ende inde
die segsluyde ende avermannen vurschr. oick eyn hebben. Geteyckent to Zutphen op den Donersdach na den Sonnendach
Invocavit Anno domini LXXXII
Anton Vedders
zei op vrijdag 11 september 2026 - 10:42