Vonnis Hof van holland 1525 (tweede deel)

Ende aengaende die mandementen penael, daervan die

verweerers als impetranten vandien genomen hebben conclusie

ten fyne van costen, concludeerde de voirsz. eyscher tot absolutie,

makende oick eysch van costen.

Tegens die verweerers de contrarie sustineerden, zeggende

dat men alle uyterste wille mochte wederroupen alsoe

lange als die testateur leefde, zeyden voort dat de

voirsz. Daniel van Zijl wederroupen hadde alsulcke makinge

als hij de voirsz. eyscher gemaict mochte hebben, blijckende bij

een instrumente in date 1522 den 9en dach van Junio,

inhoudende wederroupinge van alle instrumenten en testamenten

tevoeren gemaict ende dat overmits dat hij nae die voirsz. eerste

makinge kinderen gecregen hadde ende die naderhant gelegitimeert

ende dat nyet blijcken en zoude van eenige diensten dairvoeren

de voirsz. makinge geschiet soude wesen, enden en worde t'selve

bij der makinge niet geprobeert noch mentie gemaict van eenige

donatie, maer alleen van makinge, t'welck is legacie, verclaerende

dat die testateur t'selve dede bij manier van uyterste wille

die men tot allen tijden mochte revoceren, zoedat die woerden

int instrument geinsereert als om veel trouwe diensten

gedaen, meer geinsereert worden uyt stijl van den notarys dan

anders, t'welck blijcken mochte bij den reden dairnae volgende,

ende die hij noch doen zoude, nietemin hadde de voirsz.

Daniel int leste testament den verweerer met sijn vrunden

bedocht, laetende denzelven zekere goeden, te weten een

achtsten deel van elf schilden, een achtsten deel van elf mergen

lants, een achtsten deel van een huys, concluderende

mitsdien die voirsz. verweerers ten fyne dat den eyscher

verclaert soude zijn nyet ontfanckelijck ende voort ten

fyne van absolutie van zijnen eysch ende conclusie mit

condempnatie van costen, ofte andere sulcke fynen als

t'hof bevinden soude den verweerers oirboirlicste te wesen.

Tegens welcke antwoirde is bij den eyscher gerepliceert

geweest ende bij den verweerers gedupliceert als van den

voirsz. partien allegerende diversche middelen geinsereert in

d'acte gemaict van hoerluyder dingtale, dairbij zij gecondemneert

zijn geweest te vougen alsulcke munimenten als zij zouden

willen exhiberen ende die brengen onder zekere commissaris

van den voirsz. hove, die hunluyden vereenigen soude indien hij /

mochte of indien met zijn rappoert doen omme geappoincteert te

worden alst behoeren soude, achtervolgende deselve hebben

die voirsz. partien gedient van acten ende munimenten onder

de voirsz. commissarys die hunluyden nyet en heeft konnen accorderen,

mair al t'selve onder den hove gebrocht ende zijn rappoert

gedaen omme recht ende justitie gedaen te wesen. t'Voirsz.

hof mit rijpe deliberatie van raede deurgesien ende

overgewogen hebbende al t'guent dat ter materie dienende is,

in den name ende vanwegen des keysers van Roomen, coninck van

Germanien, van Spaengien ende grave van Hollant, Zeelant ende Vrieslant,

verclaert die renten van den voirsz. drie ponden grooten vlaems

t'sjaers den eyscher toe te behoeren, ende condempneert den

voirsz. verweerers zoe zij procederen denselven eyscher te

leveren de principale brieven van denzelven renten ende hoer

handen daervan te trecken ende den eyscher dairmede te laeten

bewairden ende oick hem te restitueren die renten van denselven

drie ponden grooten die zij ontfangen hebben zedert t'overlijden

van den voirsz. Daniel van Zijl, absolveert die voirsz.

partien hinc inde van den vorderen eysch ende conclusie tegens

malcanderen gedaen ende genomen, ende compenseert die costen

bij denzelven partien in desen processe gedaen ende gehadt

omme redenen den hove daertoe porrende. Aldus gedaen in den

Hage ... .Asscher, Dennevoirde, Benninck, Coebel, Zasbout,

deken Hugo Sonck, bailiu procureur, ende geponunchieert upten

17en dach in Julio anno 1525.

Na 'Aldus gedaen in den Hage' zal gelezen moeten worden:

'bij* Ass[endelf]t, Duve[n]voirde' etc.

*Er is hier geknoeid.