Vonnis Grote Raad van Mechelen (1536) - tweede scan

up peyne stadthoudende onder die voirsz. cautie, hen
dach beschreyden voer de voirsz. van onsen Rade in Hollandt,
tot welcken daghe comparerende hier in de voirsz. pertien
off huere procureurs vanwegen des voirsz. impetrante
in den name als boven, verhalende d'inhouden van
zijnen voirsz. mandemente penael, waer geconcludeert
geweest, dat de voirsz. gedaechde schuldich zoude
zijn te obedieren eerst ende alvoeren ten voirsz. brieve?
penael onder de cautie die hij in de greffe van den
Hove gestelt hadde, daerop vanwegen der voirsz.
gedaechde waer geseyt
geweest, dat de voirsz. cautie niet souffisant en
waer, ende daermede behoirde te gestaen, soe-
dat pertijen ten lesten hierop gehoirt, geappointeert
hadden geweest bij den commissarisen, doen wesende
ter audientie van der rolle, dat de voirn. impetrante als-
doen noch volstaen zoude metter cautie bij hen gestelt
van welcen appoinctemente
vanwegen der voirn. gedaechde hadde begheert
geweest reauditie aen den vollen Raedt, t'welck
alsoe geschiet hadde geweest, ende pertien bij den
vollen raedt gehoirt zijnde, hadde geappointeert
ende geordineert geweest, dat zij op t'different van
voirsz. cautie scrijven zouden bij memorien ende advertissement
van rechte ende daerbij voeghen alzulcke brieven,
tituelen en munimenten als henluyden goetduncken zoude, tot
welcken appointemente pertien volcomen ende
voldaen hadden, ende zichtent huerluyder productie
hierop overgeleyt ende gesien, t'hoff hadde verclaert
dat de voirsz. gedaechde schuldich waeren te verclaren
haer obedientie upte cautie bij den voirn. impetranten /
gestelt. verclarende deselve cautie alsdoen noch
souffisante achtervolgende t'mandement bij denselven
impetrant vercregen, condempnerende voerts den voirn.
gedaechden in de costen van den incidente, ter
taxatie ende moderatie van den voirsz. Hove, als dit al
blijcken mochte bij der sententie van denselven Hove daer-
van gegeven ende uytgesproken opten 29ten dach
van Maerte anno 1534 voirsz., van
welcker sententie de voirn. Huych Jacopsz ende Claes Woutersz
in den namen ende qualiteyt als boven als henluyden daer-
bij bevoelende bezwaert ende gegraveert, geappelleert
hadden aen ons ende de luyden van onsen Grooten
Rade, ende alsoe zij coerten daernae niet verheven
noch doen executeren en hadden, huerluyder appel vanwegen
den voirsz. Jan Ooms van Wijngaerden in den naem
ende qulaiteyt als boven om zijn recht in desen te
vorderen, waeren van ons vercregen geweest geweest onse openen
brieven in vorme van anticipatien, diewelcke hij
hadde doen stellen ter executien soedat behoirde, ende
ten dage daer up diendende in onsen voirn. Grooten Rade
comparerende, aldaer de voirsz. pertien off procureurs voer
henluyden naedien vanwegen des voirsz. Jan Ooms anticipants
waer verhaelt geweest d'inhouden van zijnen voirsz. openen brieven
van anticipatie ende geconcludeert al
pertinentelic in derselver materie ende tot costen
vanwegen der voirn. appellanten waeren tot zekeren
daghe daernae verclaert geweest huerluyder grieven
van appelle teghens de sententie van den voirn. van
onsen Rade in Hollandt geappelleerde, ende
geconcludeert ontfanghen te zijne als appellanten
gezeyt wel geappelleert t'hebben ende qualic
gewesen te zijne bij denselven geappelleerden, zoude
huerluyder voirsz. sententie verclaert worden niette ende van
onwaerden, ofte ten minsten gecorrigeert ende gereformeert /