Verzoek transcriptie akte van Wijven Lenaertsdr (testateur)

In den naem ons Heeren Amen. Condt ende kennelijck etc.
dat in den jare ons Heeren duysent vijff hondert drie
ende tnegentich, op den vijffden May, reguerende etc., gecompeert
es voer mij notaris publyck ende den ondergescreven getuygen (die
verclaerden  den campanten wel te kennen) 
Wijven Lenaertsdochter, huysvrouwe van Joris Ariensse, wonende in de
jurisdictie van t'Wout, wesende etc., dewelcke willende disponeren
van haire tijtlicke goeden etc., ende eerst bevelende haire
siele etc., verclaerde sij testatrice dat het gunt Godt
den Heeren Almachtich haer op deser aerde verleent heeft,
sij t'selve van heuren ouderen nyet geërvet, mer met hairen
man suyerlicken gewonnen en verspaert heeft ende want sij daeromme
gaerne soude verhoeden dat t' enden haire doot hairen voersz.
man geen moeyten ofte molestatie angedaen en soude
werden, soe eest dat sij denselven genomineert ende
geinstitueert heeft erfgenaem in de goederen die sij comparante
metter doot sal comen te ruymen ende achterlaten, geen
uuytgesondert, met sulcken laste nochtans dat 
de voorsz. hairen man gehouden sal wesen tkint
ofte kinderen bij den anderen geprocreert ofte te
procreeren, eerlicken naer heuren staet op te
brengen, in cleeidnge te onderhouden, schoole
laten gaen, ende tot huwelicxgoet te bewijsen elcx
de somme van vijftich guldens eens, bij elcx van henluyden bysonder
te ontfangen soe wanneer sij tot henne mondige
jairen ofte anders ten huwelicken state gecomen sullen
sijn, verclarende voerts expresselicken te willen
dat tgunt haire voersz, kinderen van haer testatrice
sullen comen te erven, succederen ende erven sal van
t'eene kint (sonder wettige blijvende blijckende
geboirte stervende) op t'ander kint totten lesten kinde
toe, ende tleste kindt mede alsoe stervende als voiren,
dat deselve goeden alsdan sullen comen aen hairen
tegenwoerdigen man, indien hij noch in levende
live es, ende sij testatrice renuncieert mitsdesen
alle keuren, statuten ende ordonantien ter contrarie desen,
disponerende dat tusschen man ofte vrou reciprocque, over
ende weder over, dispositie soude moeten geschieden. Alle
t'welcke etc. aldus gedaen etc. in presentie van 
Willem Aemssen ende Jan Crijnssen, loffwaerdige getuygen
hiertoe versocht ende gebeden, die desen beneffens
de comparante ende mij notaris ondertekent hebben.
X Dit es t'merck van Wijven Lenaertsdochter
Willem Adamsz van der Burcht
J. Paaequy, notaris publyck
Jan Prinssen Smit

Oke top! Super bedankt!! Geert, ik ben je duizendmaal dankbaar!!