Wij Henrick van Balen ende Walburch van Zellar, sijn echte huysvrou, doin kont allen luden, alsoe als Ott van Balen onssen brueder ende swager in /
rechter erffmaichscheidinge toe gescheiden ende ghedeylt iss een guet droige malder wynter roggen s'jaers erffpachts Nymegenscher mathe, alle /
jaer des neesten vrijdaghen na onsen Heren hemelvaertsdach te betalen uyter huyss ende hoff dat Lijsbette van Heeze toe te behorende plach ende Ot /
Bluels geheiten Raynieker nu ter tijt op woent, gelegen in den kersspell van Wychgen an beyder sijden van den Loersschen wech, gelijck die erffpach- /
ters brieff dairop ghemaeckt vorder inhelt, ende so ons dan inden selven brieve toegescheiden ende ghedeylt sijn vijff cappuyn s'jaers, der /
vier thijns ende een pacht iss, alle jair op Sinte Martijn ende drie pont s'jairs pachts, alle jaer op Niey Avont to betalen, soe bekennen /
wij Henrick van Balen ende Walburch van Zellar, echte lude vursz., in desen apenen brieve voir ons ende voir onsse erven, dat wij mit onssen vrijen /
wille in orkonde twijer erffthijnssgenoten ende erfpechtenden hyr na beschreven verkofft ende opgedragen hebben Otten van Ballen onssen bruder /
ende swager vursz. ende sijne erven die vurgenoemde vijff cappuyn s'jaers ende die drye pont s'jairs pachts die hij ende sijne erven alle jair opten /
vurgenoemde termijnen na vermoigen dess principalen brieffs vursz. tot dat vurgenoemde malder roggen s'jaers manen, heffen ende voeren sallen sonder yemants /
becroen, end bekennen dairomme voir ons ende voir onsse erven dat wij ende onsse erven van die vijff cappuyn s'jaers ende drie pont s'jairs pachts /
vursz. gansslick ende all onterfft sijn ende dat Ott van Balen vursz. ende sijne erven erfflick dair an gheerfft ende gherechticht sijn, ende then ewigen /
dagen toe then lantrecht vast ende stede wesen ende blijven sullen rustlick ende vredelick tot heffen to voeren ende to behalden sonder yemants weder- /
segghen ende alles sonder argelist, dair dit geschiede, wairen over ende an als erffhuyssgenoten ende erffpechtenden Claus Vige Claesz ende Rutger van /
Broissbeke ende meer guder luden. In orkonde der wairheyt soe hebben wij Henrick van Balen ende Walburch van Zellar echteluden vurgenoemd voir ons ende /
onsse erven onsse segelen an desen brieff gehangen ende hebben voirt tho meerder verstinsse ende sekerheit gebeden Claiss Vige ende Rutger van Broiss- /
beke vurgenoemd dat sij desen brieff myt ons ende over ons besegelen willen, dat wij Claiss Vige ende Rutger van Broissbeke vurgenoemd omb die beden will ende /
oick want wij als erffthijnssgenoten ende erffpechtenden hyr over ghestaen hebben gerne ghedaen hebben, begeven int jair ons Heren dusent vierhondert /
seven ende tachtentich dess manendaghes na den heyligen palmdach.
HW de Kleijn
zei op vrijdag 23 oktober 2020 - 20:19