Machtelt Andriesdochter is hair dingtael tegens Andries Hugesz ende Zeger
Hugesz ende die eysscheresse die zeyt dat zij die verweerders te recht heeft doen
dagen ende beclagen als dat zij stuten sculdich sellen wesen die eysscheresse voirsz. te
laten rustelick ende vredelick ontfangen alsulcke penningen als Geerte Bollen
onder heeft als roerenden van huyshuere off twee pont groot dair voir te geven
tzij off die verweerders seggen wilden dat zij die eysscheresse niet en bekennen enige
actie off eygendom te hebben in die versthoende? penningen.die Geerte Bollen onder
heeft roerende van die huyshuere, antwoirdt die eysscheresse ende seyt
dat zij sel bewijsen mit scepenen brieve van Leyden dat die huysinge ende
erve hair toe behoert ende nyemant anders dair dese penningen off sprecken.
Aldus zoe seyt die eysscheresse voirn. indien zij doet blijcken met scpenenen
brieve dat hair die huysinge toebehoert dat alsdan sculdich sellen weesen
die verweerders late ontfangen haer penningen gelijck voirsz staet, concludeert mits
desen dat hair die kenninck mede sal gaen ende die verweerders tegens ende dat
dat recht is, wes zij begeert vonnisse van scepenen ende andereerst heirop gehoert te
wesen mit hoir bewijs ende bescheyt. Actum 4 dach in October anno 1511.
...
Andries Hugensz ende Zeger Hugesz is hair dingtael tegens Machtelt Andriesdochter
ende seggen dat Machtelt voirsz. hemluyden mit onrecht heeft doen dagen ende
beclagen om hair te laten ontfangen zekere penningen roerende van huyshuer
off twee pont grooten dairvoir. Antwoirden Andries ende Zewger voirn. ende seggen
onsculde van dien eyssche want zij en bekennen Machtelt voirsz. die eygendom
te hebben an die huysinge dair dese huer dair hier nu questie om is van
comende is noch Machtelt voirsz. en sal met bewijsen als recht is dat den
eygen van dit huys dair dese hure of comende is hair toebehoert, concludeeren
die voirsz. Andries ende Zeger voirn. ende zeggen en bewijst Machtelt voirsz. met
dat den eygen van den huyse hair toebehoert dat zij geen huer ontfangen en
sel ende dat Andries ende Zeger voirn.. die kenning niet sal gaen ende Machtelt
voirsz. tegens als zij geberfen vonnisse van scepenen ende eerst hierop gehoert te
wesen. Actum den 3e in October anno 1511. Talmen Baltazar Kijf.
Aldus soe wijsen scepenen alsoe Alijt Andriesdochter in hoeren leven ten eynden toe eygelick
toebehoirt heeft ende beseten heeft een camer ende erve van denwelcken om die huyer questie
of is gelijck Machtelt voirsz. dat oick bekent heeft ende Alijt voirsz. dese camer
gemaect heeft in testament Andries ende Seger con socys naer uutwijsen des scepenbriefs
die daer of is, dat Machtelt voirsz. dairomme Andries ende Seger mit onrecht heeft
doen dagen ende beclagen om hair te llaten volgen de huyshuyer van denselven
camer, zoeverre Andries ende Seger voirsz. zweren ten heyligen als recht is dat
zijluyden Machtelt haer moeye dese voirsz. camer niet vercoft en hebben ende op die
selve coop ontfangen en hebben an gelt of clederen die somme van 20 pont hollants
ende daerop Machtelt voirsz dieselve camer hebben laten gebruycken ende die huyer
ontfangen, doen Andries ende Seger den eedt als voirsz. is. soe geven scepenen
hemluyden die kenninge gewonnen ende Machtelt voorsz. verloren ende indien Andries ende
Seger voorsz. den eedt niet en doet als voorsz. is, soe sullen Andries ende Seger
voorsz. den voir.n Machtelt voldoen van hoeren eyssch ende geven dan Machtelt
voirsz die kenning gewonnen ende Andries ende Seger verloren. Actum 21 dagen
in November anno 1511.
is gewesen dat zijluyden hoeren eedt doen sullen binnen 14 dagen naestcomende.
Actum uit supra.
Machtelt heeft hemluyden den eedt verdragen den 12en in December anno voorsz.
Louis van Veenendaal
zei op zaterdag 13 juni 2020 - 09:02