Transcriptieverzoek van regest

Ic Hughe Bastaert van Assendelft make condt allen luden dat ic tot enen erflien ontfaen hebbe van enen eersamen vader in Gode heeren Jan den Weent, abt van Egmonde /
ende van sinen goodshuuse anderhalf made lants, leggende op die wijnmarct binnen Assendelft na voirwerde ende inhout eenre hantveste, sprekende van woerde te /
woerde als hierna ghescreven staet, Jan die Weent, bi de genade Goods abt van Egmonde, maken condt allen luden, dat voir ons quam ende voir onse manne nascreven /
heer Bertout, heer van Assendelft ende ons opgaf ende quijtscont tot Hughen sijns bastaerts broeders behoef anderhalf made lants, leggende op die wijnmarct binnen Assendelft /
ende heer Bertout voirsz. vortijts ons opdroech te lyen te houden bi wille Cuneergoeden sijnre gesellinne der goeder gedenckenisse vrouwe van Assendelft van eyghelicken goede /
dat hi mit vrouwe Cuneergoeden voirsz. beliede wilc liengoet wij ontfangen hebben ende belyent ende verliet hebben Hughe voirsz. van ons ende van onsen nacomelingen tot /
enen erflien te houden ende op een after suster kint toe niet te versterven ende ymer die jonger man die voirhant te hebben voir dat oude wijff daer sij even na sijn van Hughen live /
wittelike geboren mair wair dat sake dat Hughe voirsz. sijn kinder ofte sijn kints kinder nyemant na hem en heten die wittelicken van Hughen live geboren waren /
so soude dit voirsz. liengoet wederomme op heren Bertout voirsz. ofte op sine kinderen ende die souden't dan te liene houden in allen manieren als voirsz. is, dat sal te verstaen /
wesen op een after suster kint toe niet te versterven, mair ombrake daer yet an, so soude die abt dat liengoet vrijlike aenvaen sonder yemants wederseggen, ende wair dat /
sake dat Hughe voirsz. ofte sine nacomelinge dese hantveste verloren ofte ontberet worde, so beloven wij hem ofte sine nacomelingen een nuwe hantvest alliens /
deser hantveste weder te geven buten sinen cost, hierover waren als mannen des goedshuur van Egmonde Willem uten Haghe ende Aelbrecht die Weent, ende want /
wij alle dese punten meenen vaste ende gestade te houden, so hebben wij in orconde desen brief besegelt mit onsen segele. Gegeven int jair ons Herten dusent vier /
hondert ende twee op den sevenden dach van Junio, ende want ic Hughe Bastert voirnoemt dese hantvesten mij belye ende belove vaste ende ghestade te houden voir mij ende voir /
mine nacomelingen, so hebben ic des tot enen orconde ende in getughe der wairheyt desen brief besegelt mit minen segele hier an gehangen in jair ons Heren dusent /
vier hondert ende twee op den achtenden dach van Junio.