Transcriptieverzoek

Wij borghermeysters, scepene ende ghemene raed der stat van Utrecht,
maken cond allen luden dat Harboert van Pallaes ende Jacob de Cuper,
kercmeysters in deser tijt van Buerkerke t'Utrecht, van onsen gheheyte
bi onsen wille en concente vercoft hebben Gheraerd den Bolen dy
Deric den Bolen sinen broeder, ende joncfrou Jutten, sijnre zuster, die
Ghiseberecht Gunters wijf was, om eenen somme van ghelde die si betaelt
hebben en inder kerken oerbaer gheleghet sijn ene bancstede int
nye werc optie noertside van Buerkerke voersz. hem drien ghemene
ende horen erfnamen ende nacomelinghen eweliken ende immermeer te
bliven van zevendehalf voeten wijt, een duim breet min ende zeven
voete lanc van der halver ronder pylerne noertwaert in na der
stat roede ghemeen, behoudeliken elker male hoere grafsteden die
daeronder gheleghen sijn ende hoer openinghe daerof tot alre
tijt also sij's behoeven, ende opdat dit vast ende stade blive so hebben
wi onser statzeghel an desen brief ghedaen, deser brieve sijn drie
ghegheven int jaer ons Heren dusent drie hondert vier ende
viertich des Wonsdaghes na Sinte Pouwelsdach in den afterwinter.

Geert, dank.