In den naeme ons Heeren amen. Op heden den een ende
twintichsten dach van Mey sesthienhondert een ende
t'sestich etc., voor mij Hendrick Leermaker, openbaer,
tot Oirschot residerende notaris ende den ghetuyghen
naergenoempt, ghecompareert in eygen persone
Lijsken dochter wijlen Willem Goossens Schepens,
ghesont sijnde ende haere volcomen kennisse, verstant,
wille ende memorie ghebruyckende, ghelijck ghenochsaem
was blijckende, dewelcke in acht nemende den
dienste dye sij comparante heeft ghenoten ende noch is
ghenyetende, ende alnoch sal ghenyeten van Lijsken
dochter Claes Jansz, heeft aen denselve Lijsken
ghemaect alle haere meubelen ende andere haeve,
egeene uytgescheyden, om bij deselve Lijsken
Claes Jansz van Nes doot van deselve testatrice met
vollen recht aenveert te werden, mits betaellende
aen Jan Jacops van Best de somme van ses gulden
eens, over sekere schult van geleende penninghen
dye hij Jan Jacops aen de testatrice ende haere broeder
ende susters heeft gheleent, waermede dye voorsz. Jan
Jacops hem verclaerde te houden ghecontenteert. Aldus
ghedaen in vorschreven Oirschot ten woonhuysse der comparante,
ten daeghe maende ende jaere voorsz., ter presentien van Jan
Peeter Anthonisz ende Jan Marcelissen van Eeslidt als
ghetuyghen hiertoe gheroepen ende ghebeden ende heeft de
comparante metten tweeden ghetuyge dese minute beteeckent
met handtmerck ende den yersten ghetuyghe met sijnen naemen.
X t'Merck Lijsken dochter
Willem Goossens
& t'Merck Jan Marcelissen van Eeslidt getuyge
Jan Peters van Nes
Ende mij notaris had beteeckent
H. Leermakers notaris
F. Faasen
zei op dinsdag 19 december 2023 - 11:37