Anno 1546 des Woensdages den 17en Mrty
Dat ons kenlicken is dat Johan van Duynkercken, stattromper t'Utrecht omme die doode duere ginck
ende quam aldaer voer ons int gerechte, gaff ende maicte mit sijnen vrien moetwille alle sijn goet, ruerende
ende onruerende dat hij after hem laten sal na zijnre doet, in manieren hierna volgende, in den yersten Henrick
Willemssz van duynkercken, sijnen neve, die somme van vijftich carolus gulden tstuck van twyntich
stuvers hollants, sijnen grauwen dagelixen rock, sijnen camelotten* rock mit een paer hemden, item
Jan Janssz, sijn natuerlicke soe, vijftich carolus guldens eens, zijn voor nette palsrock mit fluweel beleyt,
sijn zijde satijne wambes ende zijn beste hosen, iten Gabriel Janssz, sijn natuerlicke soen, tweehondert
gulden, item Jannegen Thoms dochter, zijn meecht, vijftich karolus gulden ende sijne swerte tabbert, item Ghijs-
bertgen, zijnen meecht, thien karolus gulden, item voert alle zijn ander goet gheeft ende maict Johan
voirsz. Claes Willemsz van Duynkercken, sijnen neve, welverstaende dat Claes voirsz. dairoff
betalen sell Johans sijne soons voirsz, schult, dootschult ende uutvaert ende voert mit vorwaerden dat Claes
voirsz. op sijnen cost houden sel in sijnen huyse Gabriel Janssz, sijnen neve voirsz, ende geven hem zijnen
behoefte van eten, drincken, cleden, schoen, vuer, licht onder ende over also redelicken ende mogelicke is duendelijck
totdat hij dertien jaeren out is omt gewinne van sijn voiirsz. tweehondert gulden die Claes voirsz. tot
dier tijt toe onderhouden sel bij also dat hij die terstont na Johan zijnen oems voirsz. doet bevestigen
sel dat Gabriel des vast ende seker zij mit sulken vorwairden indien Gabriel voirsz. offlivich wort,
sonder blijckende geboerte after te laten, so sellen dese voirsz. tweehondert gulden, off t'gene hij dairvan
afterlaten sel, comen ende erven op Claes van Duynkercken voirsz., off zijn rechten erffgenamen dan
weesende in der tijt, ende insgelijcxc indien Jan Janssz voirsz. offlivich wort sonder geboirt after te
laten, so sellen die voirsz vijftich gulden mit t'gene hem in manieren voirsz. gemaict is off t'gene hij
dairvan after laten sel oick comen ende erven op Claes voirsz. off zijn erffgenamen in der tijt dan
wesende, ende so alle dese voirsz. giften ende maikingen terstont na Johan van Duynkerckens voirsz.
doot hij will voldaen ende ten effect gebrocht sellen worden op conditien voirsz., so ordineert hij dat
zijn gereetste goeden tot gelde gemacit ende vercoft sellen worden tot so veel toe t'gene voirsz.
is geheel ende all voldaen, betaelt ende toegebrocht zel zijn, ende omme dairtoe t'geraken heeft hij
hem drien samentlicken gevende speciael ende generael bevel zijn voirsz. ghiften ende maickingen
bij vercopinge ende betalinge ter behoirlicke executie te stellen, behoudelicken indien
hij't bij sijnen levenden live wederroepe, alles zonder arch.
* camelotten: een stof gemaakt van kamelenhaar
Adriaan van Heemstede
zei op donderdag 9 december 2021 - 16:06