Anno 1535 des Donerdags den 9en Marty
Dat voor ons quamen int gerechte meyster Hans van
Duynkercken,,stattromper t' Utrecht ende Margriet zijn wijff
ende maicten malcanderen alle goett te lijftocht na den
gemenen loep ende dit was die yerste sake zijnde sonder
arch.
Dat voor ons quam int gerecht Margriet meysters Hans
van Duynkercken stattromper t'Utrechts huysfrou ende
gaff ende maicte mit handen hores mans voirsz. ende
wittelicke momboers also recht wijsde Claes Willem
Janssz van Duynkercken ende Jan Hans van Duynkerckens
voersz. naturelicke soen die hij hadde bij Aryaen [open plek] dochter
alle hoer goet, ruende ende onruende, gelt, gout, sulver,
gemunt ende ongemunt, schult ende onschult, gewonnen ende
ongewonnen, also zij after hoer laten sall na hoer doet
boven hoer schult, testament ende uutfaert Claes ende
Jan voersz. dieselve goeden aen te tasten vrijlicken
te hebben ende erffelicke te behouden ter stont na Margriet
voirsz. doot mit sulke vorwarden, waert sake dat Claes
voirsz. tot eniger tijt offlivich worde sonder levend blijkende
geboerte after te laten, so sell zijn paert van dese goeden
erven op zijn anderen brueders ende susters dan in levend live
wesende, ende wairt sake dat Jan voirsz. tot eniger tijt
offlivich worde sonder wittelicke levende blijckende geboerte
after te laten, so zell zijn deel van dese voirsz. goeden comen
ende erven op Claes voersz. indien hij dan leefde off
anders op Claes voirsz. ander brueders ende susters off
hoeren erffgenamen gebrake hoer ende wairt dat zij
wederiepe zijn, ende dit was die anderde sake zijn sonder
arch
Adriaan van Heemstede
zei op woensdag, 8 december 2021 - 16:16