Sententie Hof van Holland uit 1447 Claes van der Zevender

Sententie tusschen Lutken Jansz aen d' een zijde ende Claes
van den Zevenen mit sijnen medewerkers aen d' ander zijde.
Wij etc. Alzoe voirtijts Claes van den Zevender als clager gecomen
is voir die zeven naeste gelande van 20 mergen lants, gelegen
aen die Vlist in Rosendael in onsen lande van Hollant ende heeft
aldair die voir hunluden aengesproken mit brieven, zeggende dat
him die van zijnen ouders aengecomen waeren ende toebehhoirden, dair-
tiegens gecomen is een geheten Lutken Jansz als verweerre ende
bezitter van deselve 20 mergen lands, dewelke ter contrarien
dairentiegens seyde ende verantwoirde dat hun dieselve toe-
behoirden bij deuchdelicken coope, ende want de voirsz. zeven
naeste gelande bij hoeren vonnissen nae der voirsz. dyntalen
van beyden pertijen de voirsz. 20 mergen lands aen ons gewijst
hebben, off dair wij die laten souden, soe ist dat de voirsz. Lutken
Jansz clachtich gecomen is als eysscher ende beclager aen die
een zijde voir onsen getruwen den here van Lallaing, overste ende
onse rade die bij ons gestelt ten saken onsen lande van Hollant
ende van Zeelant ende nae overmits dat wij denselve heer van
Lalaing verdragen ende verlaten hadden van den voirsz. dienste van
onsen getruwen president ende rade zeder bij ons gestelt ten saken
derselver onser lande op ende tiegens Claes van den Zevender mit
zijne medewerkers verweerres aen die ander zijde, seggende
ende te kennen gevende de voirsz. Lutkin hoe dat over lange jaren
verleden een genoemt Louwerys Tasschemaker in tiegenwerdicheyt
van veel goeder mannen gecoft ende wail betaelt heeft tiegens
Floris van Alcmade 20 mergen lants, gelegen om de Vlist in
Rosendael, dewelcke de voirsz. Louwerys voir scout ende buyren
aldair doe ter tijt den vrijen eygen van den voirsz. 20 mergen
nae den rechte van den lande ontfanc ende dairtoe betailde hij
den heer zijnen nacoop, welc land vanwegen Floris van Alcmade
eer hij't Louweris voirn. vercofte voer sijn vrij eygen goed
rustelic ende vredelic gebruyct was 17 off 18 jair lang
ende dairnae van Louweris voirsz. sijnen eerven ende nacomelingen
voir hoir vrij eygen omtrent 28 jair dat te samen is omtrent
46 jair dattet voirsz. land rustelic ende vredelic sonder aen-
sprake of toeseggen van yemande gebruyct geweest is, dat
genoech is boven t'derdendeel van hondert jaren, ende dat
hier en boven gecomen is Clais van der Zevender ende heeft dit

Hartelijk dank Geert voor deze snelle transcriptie!

Graag transcriptie van de folio's 2 en 3 in dit tweede bestand.

voirsz. land voer die zeven dair't onder gelegen is aengesproken
mit brieven die sonderlinge punten begripen, dese twintich
mergen lands niet aendragende, want zij geen bepalinge en
houden van desen voirsz. lande ende hoewel de voirsz. Claes
van den Zevender seyde dat hem dese 20 mergen aengecommen
waeren van wijlen Jan van Almeloe, ende dat sijn brieve
ouder waren dat dat derdendeel van hondert jaeren, dat en
is niet bij desen redene, want in den landboec van der Vlist
dair alle eerven ende land in staen, dit voirsz. land gestaen
heeft ende noch staet up Florys van Alcmade ende nyet
en stond up Jan van Almeloe, ende t'land dat Jan van
Almeloe toebehoeren plach, staet over all beteykent in den
landboec up him, gelijc men in den selven boec dat noch wel
bevinden soude, seggende voirt de voirsz. Lutken dat een
genoemt Pieter Hermansz seggen woude bij sinen eede aen
all dair des van noode wair, dat hij ende zijn vader dit
land in huyrweer rustelic gebruyct ende beseten hebben
vanwegen Floris van Alcmade ende Louweris Tasschemaker
voirsz. ende der anderen dair't voirt up quam ende den eygen
hadden als voer geroert staet rustelic sonder aensprake van
yemande 45 jair off daer en boven, datter bynnen dier tijt
nyemant en quam die him dair of eygen vermat of pacht
eyschte dan nu desen voirsz. Claes van den Zevender, oic dat
meer is doe Zuythollant inbrack, soe brack in desgelijcx
Crimpenrewairt ende bleeff ridende eer hij voldijct wert omtrent
3 jair ende in tijden was in den kerken van den wairde geboden
soo wie enich land dairinne hadde, dat hij dat quame verant-
woirden ende dijcken als dairtoe behoirde off die heer soude hand
daeran slaen, soedat die ter tijt die voirsz. Louweris Tassche-
maker ende die zijne quaemen ende deden als zij sculdich waren
te doen, wairbij oirc meerckelic is hadde Claes van den Zevender
of zijn voirvaeders dairtoe enich recht gehadt, dat hij of sij
gecomen souden hebben om dat te verantwoirden ende hant aen te
slaen, voirt meer doe Jan ende Steven van den Zevender mit hoiren
kinderen leefden, soe en onderwonden sij hem niet van den voirsz.
lande t'welke de voirsz. zeven aen ons gewijst hebben off dair
wij dat laten souden, ende want dit voirsz. land toebehoirt /
heeft eerst Floris van Alcmade, darinae bij cope Louwerys
Tasschemaker ende zinen eerven, ende bynnen corten tijden harwairt
de voirsz. Lutken Jansz die dit land tegen Jan Voet die dairin
gherechticht was gecofft, betaelt ende him voldaen heeft, niet
wetende doe hij't cofte, noch noch en weet dat wij off onse
voirvaderen dairtoe enich recht hadden off hebben mochten, wair-
om him zeer vervreemt bij wat reden die voirsz. zeven dit aen
ons gewijst hebben ende meynde dat sij slichtelic dairinne
voirtgegaen ende gewijst hadden, gemerct dat sij him nergent
bevragen noch beraet halen en wouden t'welc is tot grooten
affterdeel des voirn. Lutken, wairom hij onsen voirsz. rade
oitmoedelic badt dat hunluyden bekennen wouden die voirsz. zeven te
ombieden voer hem in Den Hage. om te horen ende te weten bij wat
rechte ende reden zij t'voirsz. land aen ons gewijst hebben ende
off zij hierof geen reden bewisen en konnen, so badt de voirsz.
Lutkin hunluyden voirt gemerct dat hij t'voirsz. land duechdelick
gecoft ende wel betaelt heeft, dat men him gracie doen woude
ende t'voirsz. land gonnen ende vredelic laten gebruycken, op welken
eysch ende aensprake de voirsz. Claes van den Zevender him mit
sinen medewerkers hier en tiegens pertie makende verantwoirden
ende seyde, eerst up t'geent dat de voirsz. Lutken seyde dat Floris
van Alcemade de voirsz. 20 mergen lands beseten soude hebben,
gelegen aen die Vlist ende van sijnre wegen gebruyct geweest
hadden 17 of 18 jair lang etc., dat de voirsz. Floris in den
ambochte van Haestrecht aen de Vlist van sinen ouderen
nye geen eerve noch land genomen en heeft noch gecoft
dair hij eygendom of ontfanghen heeft naer recht van den
lande, mer is wel wair dat de voirsz. Floris des voirsz. Claes
moeye, die zijns vaders zuster was, tot eenen geëchten
wive gehadt heeft ende dese voirsz. 20 mergen lands den
selven Floris nye te hilick gegeven en zijn t'welc de voirsz, Claes
mitten hilixvoirwarden bewesen woude, voirt up t'geene dat
de voirsz. Lutkin screeff dat een genoemt Louweris Tassche-
maker de voirsz. 20 mergen lands tiegen den voirsz. Florys
gecoft soude hebben ende 28 jair beseten, sechde de
voirsz. Claes dat de voirsz. Lutkin voir de voirsz. zeven binnen
der dinctalen den eygendom ende besit van Floris ende
Louweris voirsz. niet en heeft bewijst noch wair gemaict /

Beste Geert,

Wederom dank voor deze transcriptie.

Is die met behulp van een computer gemaakt?

Anton

Graag een transcriptie van folio 4 en 5 in dit derde bestand.

mit bezegelde brieve of levendigen tuge als hij van rechtswegen
sculdich wair te doene, ende als Lutken screeff dat des voirsz. Clais
brieve geen bepalinge en houden, sechde de voirsz. Clais dat hij
dat wel bewijsen sal mit goede segele ende brieve dair dit voirsz.
land wel in bepaelt staet, dattet sijn ouders geweest heeft
ende nu up him bestorven is, hoewel dattet sijn vader ende him
tot nu toe off vervreemt geweest heeft, dat is geschiet mids
dat de voirsz. Florens alle die brieve van den eerfnisse him t'on-
bruyck gemaict hadden, aldus en wisten sij niet hoe te spreken
eer hij hair brieve hadden, ende als de voirsz. Lutken schreef
dat een genoemt Piet Hermansz geseyt soude hebben dat hij
ende zijn vader dit land in huyrweer gehadt souden hebben
van Florys ende Louweren voirn. ende den anderen dairt up quam
voirt ende den eygendom gehadt hebben 45 jair ende dair en
boven hierop seichde de voirsz. Claes dat desen tuych nye voer
die zeven noch voir scout noch buyr gecommen en is ende all
hadde hij alle gecomen dat en soude hem niet hinderen, want
Florens en hadde an dit voirsz. land nye eygendom noch recht-
vairdich besit, item dair de voirsz. Lutken screeff dat Crympenre-
wairt ingebroken was doe Zuythollant inbrack mit meer
punten hieroff roerende, antwoirde dairup de voirsz. Claes dat sijn
ouders brieve van de voirsz. lande t'onbruyck gemaict waren,
aldus en wiste sijn ouders niet wair hoer goede gelegen waren
ende oic hebben twee zwair oirlogen geweest ende de voirsz. Clais
ende sijn evenknyen waren doe onmondige kinder, ende onwetende
en mach mogelic nyement mit rechte also onteerfft worden,
item screeff de voirsz. Lutken voirt dat Jan ende Steven van der
Zevender, gebroederen, up ende neder gegaen hebben ende niet nae
dit land getailt, wairup de voirsz. Clais zeychde dat hi mit
meer anderen van goeden oude wittafftighen knapen gehoirt
hadde dat de voirsz. Floris hem vermat ende den voirsz. Jan
ende Steven dede te verstaen dat dit voirsz. land ende meer
andere lande van den selver eerfnissen heerlicke versteerflicke
leengoede waren ende dat hij ten eygen tiegen hertoge Aelbrecht
gecoft hadde om een somme van penningen, dat alzoe niet en
is, want de voirsz. Claes dat wel bewisen woude mit des
selven hertoge Aelbrecht brieve dat Jan van Almeloo die goede /
gecoft ende wel betailt hadde tiegen den heer ende hoewel
de voirsz. Floris zijn zwagers dit dede te verstaen, so wairen sij
nochtans altois beclagende van hairre oude nae de goede, mer
sij en wisten dit niet te bewisen, want Floris voirsz. die brieve
hadde ende zij niet, item dair de voirsz. Lutken screeff ten begeerde
dat men die zeven ombieden soude ende him vragen mit wat be-
scheide zij dit voirsz. land ons of dair wij 't laten wouden mit
rechte gegeven hadden, seichde de voirsz. Clais dat him dat wel
te wille wair, item seichde voirt de voirsz. Clais dat ten tijden doe
de voirsz. Floris van Alcmade in den onrechte gevallen was van den
brieven roerende desen erfnissen voir den heer van Santes mit meer
anderen van onsen rade, die doe Jan van den Zevender die cofferen mitten
brieven leverden, dese selve Lutken Jansz bruycte twee hoeven
lands, gelegen aen die Vlist van den voirsz. Cersmissen dewelke
des voirsz. Lutkens vader plach te bruycken van den voirsz. Floris
ende gaff him dairof den pacht menich jair, mair zeder
der tijt dat de voirsz. Jan van den Zevender gewijst was aen de
voirsz. brieven soe tooch die voirsz. Floris sijn hande van dese
voirsz. twee hoeven lands, ende de voirsz. Lutken betaelde daerof
van dier tijt voirt den pacht Jan van den Zevender, op
welke antwoirde de voirsz. Lutken Jansz replicierde, eerst up
dat punt dat dat niet en is bi dese reden, want de voirsz.
Floris ontfangen heeft eenen vrijen eygendom van dese
voirsz. twintich mergen lands voir overgegeven bij tijden s'heren van
Arkels, dat men wel mit dat landboec bewisen soude dat
dair noch off of is, voirt dair de voirsz. Clais screef dat
de voirn. Lutken binnen der dinctalen voir den zeven tuych
den eygendom ende besit van Floris ende Louweris Tasschenmaker
voirsz. niet en heeft bewijst etc., seicht de voirsz. Lutkin dat
hij goede warachtige tuge hadde voir der dinctalen die de
voirsz. zeven niet horen en woude, welke tuyge hij noch brengen
woude dair des van noode wair, item als de voirsz. Claes
screeff dat hij dat bewisen woude mit goede segel ende brieve
dair dit voirsz. land wel in bepaelt staet datte sijn ouders
geweest heeft, ende nu up hem bestorven, hierop seichde de
voirsz. Lutkin dat des voirsz. Clais brieve ende sijn vermet hem
niet hinderen en soude, want hij altijt bewisen woude dat de /

Beste Geert,

Hartelijk dank voor de transcriptie, die nu familieverbanden onthult en ontbrekende stukjes van de puzzle oplevert.

Graag ontvang ik een transcriptie van folio's 6 en 7 in bestand 4 van 6.

Groet,

Anton

voirsz. Floris den eygendom ontfangen heeft van die voirsz. 20
mergen lands ende die vercoft heeft den voirn. Louwerijs Tassche-
maker die se rustelic gebruyct ende beseten hebben tot desen dage
toe, die een voer ende d'andere nae, welke besit langer geweest
heeft dan dat derdendeel van hondert jair wairom hij moge-
licke bij sinen goede ende eygen bliven soude, item alsoe de voirsz.
Clais screeff dat sijn ouders brieven van den voirsz. goede t'onbruyck
gemaect waren ende alzoe en wisten sij niet wair hoir goede
gelegen waren antwoirde de voirsz. Lutkin alo sij t'IJsselsteyn
woende of dair omtrent, ende nye buten lands en waren ende horen
pacht aen die Vlist plagen te manen ende hoirre beyder vader
wel wiste dat die voirsz. 20 mergen hoir niet en waren, want
dat merckelic is dat sij nye pacht en maenden, noch aen-
sprake en deden van dese voirsz. 20 mergen lands, seichde voert
de voirsz. Lutkin dat hem die coop van desen lande die de
voirsz. Clais screeff gedaen te wesen tiegen der graeflicheit
van Hollant niet hinderlic wesen en soude alzoe hij ende sijn
voirnomden altijt eenen vrijen eygendom ontfangen hebben
van dese voirsz. twintich mergen, ende upte voirsz. replike
soe seyde ende duplicierde wederom de voirsz. Claes van der
Zevender, eerst up t'geent dat de voirsz. Lutkin screeff dat
Floris van Alcemade voirsz. eenen vrijen eygendom ontfangen
soude hebben van den voirsz. 20 mergen lands die hem overgegeven
wesen soude bij tijde des heren van Arkels etc., dat hij dair up
begeerde te weten wie ende hoe hij genoemt wair geweest
die desen eygendom overgegeven ende Floris voirsz. ontfangen
soude hebben, meynende dat dit alzoe niet en wair ende dats
de voirsz. Lutkin niet bewisen en soude mogen, item alsoe
voirt deselve Lutkin seide dat hij goede warachtige tuge
hadde voir der dinctalen, welke tuyge die zeven niet hoiren
en wouden, duplicierde de voirsz. Clais dat hij voir den
dingbanc nyement gesien en hadde die rede was om te
tugen, ende al hadde die zeven genen tuych willen hoiren,
soe mochten zij dat voer die rechtbanc begeert ende gedinget
hebben dat men sculdich geweest hadde horen tuych te horen
ende men soudt hem toegewijst hebben, want men dat nye-
ment en pleecht te weygeren, item ten genen dair de voirsz. /
Lutkin screeff dat des voirsz. Clais brieve die hij heeft van dese
20 mergen lands him niet hinderen en souden bij redenen wairt
hij altijt bewijsen woude dat Floris den eygendom van desen 20
margen lands ontfangen hadde ende dese selve Floris dit lant vercoft
hadde Louweris Tasschemaker, die dat rustelic beseten soude
hebben tot deser tijt toe, d'een voer ende d'ander na, dat langer ge-
weest heeft dan een derdeneel van hondert jaren ende dat hij
dairom bij desen goede bliven soude, dupliceerde die voirsz. Clais
dat Steven van der Zevender, sijn oom, vlusch int t'selve jair na
der zoenen gemaict tusschen ons ende onsen nichte vrou Jacob
hertogynnen in Beyer, saliger dachten, aentastingen dede mit rechten
aen twee hoeven lands dair Floris voirsz. doe mit onrechte in
geseten soude hebben ende dat corts dairna Steven voirsz. starff
ende Jan sijn soon vervolchde dat sijn vader begonnen hadde,
seggende datter meer lands van derselver eerfnisse wair van
zijnen oouderen gecomen, dat hij vervolgen woude dat goeder
mannen genoech tot Haestrecht te gedencken wesen soude ende
als Floris voirsz. een wete gedaen was van Jan Lutkins soon,
die Lutkins vader was, dat corts dairna starff Steven
van den Zevender ende Jan sijn sone vervolchde voirt dat sijn vader
begonnen hadde als voer geroert staet ende dat doe Floris voirsz.
quam voirs onsen rade in Den Hage, clagende over Jan, begerende
dat men hem ontbieden woude, also dat Jan mit onsen brieven
ontboden wort ende dat hij tegen Florens een jari lang voir
onsen rade te rechte gegaen soude hebben of langer ende dat
Jan sijn brieve toegewijst soude hebben geweest dair bescheit
van sijnre ouder eerve in gevonden soude wesen, dat hij van
dier tijt voirt die erfnisse vervolchde mit rechte, aldus en
hadden Floris ende Louwerns Tasschemaker geen rustelic besit
gehadt, want dat besit over menich jaren gestoort hadde
geweest, item also Lutkin int t'selve artikel roerde dat hij
altijt bewisen woude dat Florys van dezen 20 mergen lands
een eygendom ontfangen hadde, dupliceerde die voirsz. Clais dat
Lutkin dat nye bewijst en hadde, noch oic bewisen en soude,
dat sijn oduers Florys voirsz. ye eygendom van dezen lande
voirsz. overgegeven hadden off ofstal gedaen hadden als recht /

Beste Geert,

Het gaat fantastisch!

Graag ontvang ik een transcriptie van folio's 8 en 9 in bestand 5 van 6.

Groet,

Anton

wair ende dat bij dien redenen Floris of die't t'voirsz. land van
sijne handt hadden gheen besit noch recht en hadden an t'voirsz.
land, item ten genen dair Lutkin roerde in sijne supplicatien
van den landboecke dupliceerde die voirn. Clais dat dat landboec
voir die zeven gebrocht wart die geen punten dair in gevonden
souden hebben van wairden wezende, meende oic die voirsz. Lutkin
dat hun dat stade doen mochte, dat hij mitten voirsz. boecke
quame voir ons voirsz. rade, men soude him mit bezegelde
brieven dairup antwoirden, item dair Lutkin voirn. repliceerde
dat Claes ende Jans ouders tot IJselsteyn woenden ende hoiren
pacht an die Vlist souden gemaent hebben, nede niet van den
voirsz. 20 mergen lands, dupliceerde die voirn. Clais dat
sijn ouders nye in 31 of 32 jaren gewoent en hadden
noch oic geen pacht an die Vlist gemaent en hadden,
item dair Lutkin repliceerde dat die coop die Claes ouders
tiegens hertoge Aelbrecht gecoft hadden, him niet hinderlic
en wair, want hij ende sijn voirvaders altijt eenen vrijen
eygendom van den voirsz. lande ontfangen hadden, dupliceerde
die voirn. Claes dat sij van sijnen ouderen ghenen eygendom
ontfangen en hadden als voer genoech geroert wair, seide
voirt die voirsz. Clais dat him wail te wille ende te dancke
wair dat men die zeven ontbode buyten sinen cost, item dair
Lutkin screeff in sijnre replike dat doe Crympenreweert
ingeborken was ende een gebod gedaen was dat een
igelic sijn land weder dijcken soude ende Jan van den Zevender
ende Steven sijn broeder binnen lands woenden ende bedijcten
mede hoir goede die sij in Crympenreweert hadden ende
hadden sij recht gehadt tot desen 20 mergen lands voirsz.
sij souden ze wail mede bedijct ende aengetast hebben
dupliceerde die voirn. Claes dat sijn ouder brieve van den
20 mergen lands voirsz. Floris voirn. him ten bruyck
gemaict hadde also en wisten sij niet wair sij hoer
goede vinden souden, gelijc hij dat mit meer ander
punten in sijn eerste supplicacie geroert ende onderwijst
heeft, item dair Lutkin repliceerde in t'sluyten van /
sijnre replike dat die zeven dit land voirsz. wat haestelick
gegeven soude hebben ende hem oic niet beraden en wouden, du-
pliceerde Clais dat sij vollen achte weken ende dairtoe hoiren
dwersnacht genomen hadden te beraden ende hadden him bevraecht
tot veel steden ende sonderlinge in die stadt van Utrecht dat
die ouste stadt van dit bisdom is ende dair veel goeder geleerde
jursiten zijn ende oic veel wijzer goeder loeker mannen dair sij
him mede besproken ende beraden hadden ende dat zij also overscreven
ende beclaichden die zeven mit onrechte ende dair Lutkin oick
screeff dat hij dit lant gecoft ende wel betailt hadde, dupl-
ceerde die voirn. Claes dat Lutkin t'voirsz. landt niet wail
gecoft of wail betaelt hadde, want hij's jegens him off
sinen ouders niet gecoft noch betailt en hadde, die van
godsrechte den eygendom van den voirsz. lande toebehoire,
die voirsz. Claes seechde voert in sijnre duplike, hoe dat
Lutkin voirsz. roerde tot 2 off 3 steden in sijn cedulen, dat
Floris van Alcmade den vrijen eygen vanden 20 mergen lants
ontfangen soude hebben, dat nye bewijst noch wair gemaict
en soude hebben, ende omdat Claes voirn. ende sijn medewer-
kers vermoeden dat sommige lude niet en weten wat een vrij
eygendom is na den rechte van den lande van Haestrecht
dairom gaff Clais voirn. onsen voirsz. rade te kennen dat die-
gene die hem eenen vrijen eygendom vermet die moste dat
bewisen ende wair maken dat diegene die die goede heeft ende
sijn sijn gecomen is voir den scout ende buyrlude van den lande
aldair die goede gelegen sijn ende heeft die goede mit vrijen
wille mit hande ende mit monde overgegeven ende een ander
van sijnre hant ontfangen ende dat en souden Lutkin Jansz
voirsz. noch nyement bewijsen dat heer Jan van den Goude
dair deze goede of gecomen waren of Jan van Almeloo
die heren Jans van der Gouden enige dochter tot eenen wive
hadde, off Jan ende Steven van den Zevender, gebroederen, die
rechte erfnamen waren van Jan van Almeloo ende van sinen
wive, ye enich ofstal of overgifte gegeven hebben van desen
voirsz. lande mit hande ende mit monde als recht is ende
als him Lutkin Jansz vermet, seggende bij alle desen /

Beste Geert,

Wederom mijn dank voor uw geweldige service!

Hierbij stuur ik u dan de laatste folio 10 in bestand 6 van 6 voor transcriptie.

De vele namen die zijn vermeld in de onderhavige sententie hebben me uitstekend geholpen met het ontrafelen van familieverbanden.

Groet,

Anton

redenen de voirsz. Clais van den Zevender mit zijnen medewerkers
dat hu duechdelic presenteerde te proeven alzoe veer als him
nood wair gerechticht te wesen in de voirsz. twintich mergen
lands ende dat him die sculden waren bij onsen voirsz. president
ende rade toegewijst te wesen. Alle dewelke redenen ende
allegacien bi beide den voirsz. pertien in eyssche, antwoorden,
repliken ende dupliken voirtgeset ende geproponeert mitten
ondersoecke ende inquisicie tot diverschen stonden gedaen
optie feyten bi den voirsz. pertien voirtgestelt bi zekeren commis-
sariyzen dairtoe van onsen wege geoirdineert ende den
reprochen ende salvacien bi beyden pertien overgegeven overgesien,
gevisiteert ende wail verstaen bi onsen voirsz. president ende
rade ende al t'geent gewegen dat in desen sake sculdich is
gewegen te wesen, soe hebben deselve onse president ende
rade uutgesproken ende gewijst voer recht dat mit goeden
raden de voirsz. Lutkin Jansz him becroont ende beclaecht
heeft van den voirsz. 20 mergen lands, dairoff hierboven
mentye gemaect is tiegens den voirsz. Clais van der
Zevender ende zijnen medewerkers, ende dat deselve Lutkin
Jansz in de besitte ende eygendom van denselve 20 mergen
lands dair questy off was ende gelegen sijn aen die Vlist
in Rosendale gerechticht is ende dat hij dairin rustelic
ende vredelic wesen ende bliven sal, ende als van den costen gedaen
bi de voirsz. pertien int vervolgen van desen sake, want hoeren
geen hoir costen geeyscht en hebben, soe hebben de voirsz.
onsen president ende rade geseyt dat elc sijn costen aen him
selven houden sall. Gegeven upten [open plek] dach van Januario
anno 1447 curse curie.

Beste Geert,

Reuze bedankt voor deze monsterklus!

Zoals reeds gemeld ben ik weer een stukje verder met mijn genealogisch onderzoek.

Vaak maak ik voor die periode gebruik van secundaire bronnen, maar soms ontkom je er niet aan originele stukken bij het onderzoek te betrekken.

Met vriendelijke groet,

Anton