Wij, Sebastiaen Pevel ende Godevaert Snijers,
mannen van leene van Mercxem ende Schooten, maken
condt dat voor ons quam Alexander van Coppennael
ende bekende schuldich te sijn van goeder rechtveerdige
schult Jacobe ende Willeme Ghijsels, gebroederen geseten
tot Mercxem, de somme van hondert guldenen eens
van twintich stuyvers Brabants tstuck, ter saken van
geleenden gelde, bij hem comparant reëlijck ende metter daet
ontfangen, welcke voornoemde somme van hondert guldenen hij
comparant heft geloeft ende geloefde mits desen wel ende
volcomelijck te geldene ende te betalene den voors. Jacobe
ende Willeme Ghijsels, oft brengere deser, te Bamisse
naestcomende, sonder eenich voorder uutstel oft vertreck,
daer vore verbindende ierst sijnen bempt tot Schooten,
genaempt den Langen Briel, groot vijf vierendeelen bunders,
belast met achtentwintich guldenen ende twee ende eenen halven
stuyvers erfelijck, ende noch sijn huys metten gronde
ende toebehoorten, gestaen ende gelegen in Borgerhout, groot
vijfentwintich roeden ende ses voeten, genaempt den Cleynen Colve,
belast met vijfentwintich guldenen erfelijck, al sonder
meer, ende voordane hem selven ende alle sijne andere
goedenm rierdne ende onruerende, hoedanich die wesen mogen,
die hij nu heft ende noch vercrijgen sal ende alomme
waer ende tot wat plaetsen die gelegen sijn ende bevonden
sullen worden. Ende dat al op vonnisse ende aloft
hij comparant daer inne also ter manissen des
drossaerts, bij vonnis van leenmannen alhier
gedoempt ende gecondemneert ware, gelijck wij
leenmannen bovengenoempt hem tsijnen versuecke daer inne
ter manissen voors. gecondemneert hebben ende condemneren
mits desen, ende oock mede op reale, heerlijcke ende
gerede executie, sonder eenige andere rechtvoorderinghe
daeromme te derven doene, renuncierende de voors.
comparant tot alle tgene des voors. is van alle
exceptiën, defensiën, brieven van atteminatie, cessiën,
rekeninghen, merctvrijheden ende allen anderen privilegiën,
---
behulpen, beneficiën ende remediëen van rechte die
hem hier tegens eenichsints te hulpen ende staden souden
mogen comen ende defect van deses beletten in eeniger
manieren ende besunderlijck ook vanden rechte seggende
dat generale renunciatie oft vertijdenisse van geender
weerden en is, ten sij de speciale voorgaende constituerenden
voorts Gerarden Bernaert ende Diericken Smit, beyde
vorsters van Mercxem ende Dambrugge, ende elck van hen
besunderlijck omme de verbintenisse van tvoorsz.
huys metten gronden ende toebehoorten, geheten de Cleyn Colve
van sinen twegen andermael te doen ende te vernyeuwen
voor de weth van Deurne ende Borgerhout, des noot sijnde.
Sonder argelist. Ende des toirconden hebben wij, leenmannen
bovengenoempt, onse segelen hieronder opgedruct. Gegeven
int jaer Ons Heeren alsmen screeff duysent sessehondert thien
vijf dagen inde maent van april.
Linkermarge:
Dese 100 guldenen sijn betaelt
bij Tanneken Coppe-
nael, weduwe wijlen
Christiaen De Ridder,
uuytghenomen de somme
van XII guldenen die de
voorsz. Tanneken
ende Betteken Coppenael
ende Melsen Coppenael
ten proffijte vanden
voorss. Jacob ende
Willem Ghijsels hebben
verleden op den 4
octobris 1619 voor
mij, Augustijn Noydens,
notaris, ende sekere
ghetuyghen staende te
betalen binnen den
... juste
Gerrit Verhoeven
zei op zondag 30 maart 2025 - 09:50