Deselve persone totum ut supra bekenden ende verlijden alsoe Luycas van den Broeke voers.
voer den meyere ende mannen van leene Henricx Faes Brouwers in sinen hove tot Schooten vercocht ende opgedragen heeft
Gheerde van der Hoeven, Lambrechtss. wijlen woenende tSchooten, een stuck lants cum fundo et
pertinentiis houdende omtrent 1 buynder, ombegrepen van der maten, gelegen tSchooten achter de Borch in de
Dueselt, tussen Henricx Faesen erve aen de suyt- ende noortzijde, comende metten westeynde
aen sheeren strate, ende noch omtrent 5 buynder lants cum pertinentiis, geheeten den Vogelpoel, gelegen
tSchooten voers. in den Dueseltacker, tussen Henricx Faesen erve aen de noortzijde,
comende westwaert aen here Jans van Ranst ridders erve, ende oostwaert aen des godshuys
van Sinte Lysbetten alls tAntwerpen erve, ende want de voers. Luycas voer hem ende in den name
van sinen medeplegeren voerscr., alleene, mits dat hij de voers. twee stucken lants bij der doot
van Janne de Haze, sinen oem daer hem ende sinen medeplegeren die af bleven ende verstorven zijn, den
voerg. Gheerde van der Hoeven voer den voers. meyere ende mannen gegoet ende gevesticht heeft
soe eest dat de voers. personen voer hen ende in den name als boven, geloeft hebben ende geloven
pro se et suis, deselve twee stucken lants cum pertinentiis predictis te waerne ende te claerne tallen dagen
los vrij ende quite van allen commer ende calangien ende [...] dair uutgaende, gebrake iet aen den coop
voer den voers. meyere ende mannen in den hove voerscr. gedaen, aen de waernisse ende claernisse voerscr.
oft dat hen ennigen hinder stoot last oft moeysel quame, ende aengedaen werde van den personen
boven vervangen sijnde, hoc promiserunt de voers. Luycas van den Broeke, Aert Aerts, ende Magriete sijn
wijff, satisfacere cum se et suis, ende elc van hen altijt ongesondert een voir al.
eodem die
Gerrit Verhoeven
zei op maandag 17 april 2023 - 17:20