Oplossingen Paleopuzzel 136: Een peert met twee glasen ooghen

Allen den gheenen ect. Wij Peeter Tack ende Cornelis
Adriaenssen van Donghen, schepenen der heerlijcheyt ende
vrijheyt van Oosterhoudt doen condt eenen ygelijcken
dat ten versuecken van Godert Anthonissen onsen medeschepen
op den dach der date ondergescrhreven voor ons ghecom-
pareert sijn in proproe persoonen Cornelis Cornelis Buys
oudt omtrent XLVIII jaeren oudt schepen ende tegehnwoor-
dich heylich geest meester ende Cornelis Heyman Cornelissen
oudt XXXV jaeren alnoch teghenwoordich ghesworene
bedesetter rechtelijcken van sheeren weghen alhier
gedaecht sijnde om der waerheyt getuychnisse te gheven
soo sij seyden. Ende hebben bij hunnen eede daerom
alnu behoorlijck gestaeft sijnde voor warachtich
verclaert getuycht ende gheaffirmeert hen wel kennenlijck
te wesen als dat de voorgenoemde Godert Anthonissen
van vrijheyts weghen heeft gedient met eenen waghen ende drye peerden
(waer in Jan Schalcken twee peerden heeft gehadt)
het leger voor de stadt Grave int jaere 1602.
En aldaer int selve quartier des voorsz. Godert
Anthonisse peerdt is verloren gheloopen overmidts den knecht
doen ter tijt sieck was gheworden, wesende onder /
met meer andere veel peerden sijn opwaerts in tlant
gereden ende aldaer is achtergebleven. Sulcx
dat hij producent versuect die prijseringhe ofte
waerderinge van wat weerde ofte prijs tvoorsz. peert
soude wesen hierop verclaren sij deponenten hen
wel kennelijck te wesen dattet tvoorsz. ruynpeerdt den
voorgenoemden Ghijsbrecht heeft moghen gelden voir datum
van den halen elff pondt vlaems. Ende daerom hij producent
tselve peerdt aldoen niet en begeerde te vercoopen.
Ende dat tselve peerdt wel weert was twaelff
pondt vlaems. Voor redene van wetenschap geven
de voorgenoemde deponenten dat sij in de gebuerte van den
voorsz. Ghijsbrecht sijn woonende ende hierom hen kennelijck
is ende wel weten dat hij producent tvoorsz.
peert langhen tijt heeft ghement ende gevoert.
ende want ment ect. Actum den 22 July 1603.