Pieter Geryt Golenzoon is zijn dingtael tegens Alijdt Huge Jan Bartoutzoons weduwe ende Pieter
voirsz. die seyt dat hij Alijdt voirn. te recht gepant heeft na uutwijsinge zijn scepen brief, die
gans gave ende inder macht was doe Pieter voirsz. daermede pande an hoir poortrecht
alsoe zij hem geen goet en wiste te bewijsen, dan hij an panden mochte ende hoir poortrecht
mede bescutten ende Pieter voirsz. die seyt dat hij na den recht van der stede hier mede
in zijn recht volstaen sel ende te recht gepant heeft ende dat zij die selve pandinge
mit onrecht gekeert heeft, dit seyt Pieter voirsz. dat recht is ende begeert des
vonnis van scepenen ende eerst hier op gehoirt te wesen. Bij Simon Payge .. die andren
Alijdt Huge Jan Bartoutszoons weduwe mit hoiirs gecoerens voichts hant is hoir dingtael tegens
PieterGgeryt Golensz ende Alijdt voirsz. die seyt dat Pieter voirn. hoir te hoge ende mit onrecht
gepant heeft ende soe wye te hoge pant dat die na den recht van der stede mit onrecht pandet.,
Ende seyt reden wairbij ende wairom. Alsoe Pieter voirsz. enige willige pande up ten voirsz.
scepen brief ontfangen heeft, te weten 1 stalen pansijser, een treeft, een selas, welke goeden
Pieter selver getaxeert heeft tot zijns selve seggen buyten weten ende consente van
Alijdt voirsz. ende heeft hij dat upten scepen brief geteyckent dat en weet Alijdt voirsz. nyet.
Ende Alijdt voirsz, die seyt dat die selve goeden ongelijc beter zijn dan dair se.Pieter voirsz.
voir gescat heeft tot sijnen wille. Bij dese voirsz. redenen soe seyt Alijdt voirsz. dat hij
hoir te hoge ende mit onrecht gepant heeft an hoir poortrecht. Want zij noch wel
andere goeden heeft ... ende van wye te hoge pant dat die mit onrecht pant, ende
dat zij dairomme die selve pandinge te recht geweert heeft. Dit seyt zij dat
recht is ende begeert des vonnisse van scepenen ende eerst hier up gehoirt te wesen.
Bij Willem Jansz .2e, die andren anno 1485.
Aldus zoe wijsen scepenen alsoe Pieter Geryt Golensz gepant heeft Alijdt Huge Jan Bartoutszoons weduwe
an hoir poortrecht mit enen scepene brief die is gans gave ende in zijnre macht ende Alijdt
voirsz. geen goeden en bewijst hoir poortrecht mede te bescutten, dat Pieter voirsz. blijven sel in
zijnre pandinge ende goeden, Pieter voirsz. die kennync gewonnen ende Alijdt voirsz. verloren. Actum
opten 15 dach in Julio anno '85.
Louis van Veenendaal
zei op zaterdag 23 mei 2020 - 08:39