los vel bij OH 285 fol 32 deel 1

Dit is deel 1 en deel 2 samen:

Compareerde Jan Peter Adriaen Mertenssone,
onssen mede schepen, sieckelijck te bedde
leggende, nochtans sijne vijff sinnen overal
wel machtich ende verclaerde bij den eede
die hij als schepen der vrijheyt van Oisterhout
voirschreven gedaen hadde, dat hij deponent
omtrent twee jaeren geleden heeft sitten drincken
ten huyse ende herberghe van Aert Verheyden,
vergeselschapt met Peter Peterssz, onder andere
propoesten vercoft Peter Peterss aen hem deponent
een weyde off segghe ten halfven weijncoop op
des ... besien ende so pertijen tsamen de
zegge besaegen, stondt deselve onder water,
sulcx dat van de weeke landerijen nyet te sien
en waer, ten selven tijde naer t'besien sijn
pertijen wederom gaen sitten drincken ten huysse
van Aert Verheyden, daer de voorgenoemde Peter Peterssen
verclaerde datter in de voorsz. zegge veel moers
lach, seggende dese off gelijcke woorden
in effect so verde als ghij de biesen ende
t'riet siet staen daer leyt noch moer, op
welck schoon toeseggen den deponent
de weyde off zegge cofte voor tachentich
rijnsgulden indien de moer sulcx bevonden wordde
gelijck hij vercooper dyen aengenoempt hadde
ende so hij cooper deponent bedroeghen was,
overmits toeseggen van den vercooper onwaerachtich
was, is uuyten cooper van de moer gescheyden /
verclaerende den coop te wesen van onweerden,
verclarende mede de voorgenoemde deponent dat
hij hadde seecker proces hangende
ongedecideert voor mijn heeren van daer
...bancke van Breda tegens Quirijn
Gerit Jacobss, seggende hij Jan Peterss dat
zijnen heysch was deuchdelijck ende  lichtverdich,
doch begherende op dcese twee pointen te
nemen sijn heyligh sacrament. Aldus verclaert
t'sijnen huysse liggende in sijn sieckbedde
desen 25 Marty XVC ende eenentnegentich,
ten overstaen van Wijnen, Berghen ende
Cop, schepenen in Oisterhout, mij daer oyck
jeghenwoordich.
[ondertekening]