Aelwijn Meesz als gemachtich van Jan Willemsz is zijn
dincktael jegens den boelhouder ende erfnamen van Pietertgen
Adriaensdochter saliger memorien, segt hemluyden mit
recht te hebben gedaecht ende beclaecht om betaling
te hebben van de lopende renten van zekere penninck die
hem voortijts voir zijn moederlijcke erve bewesen zijn
ende dat voir den tijt van zulcke zes jaeren als hij uuyt-
landich is geweest ende oeck van andere goeden des
jairs de somme van vijff pondt groot off 30 £ groten
vlaems daervoir te geven ende om te coemen tot verstant
vandien zoe is wairachtich hoe dat zijn vader hem
voirtijts voir zijn moederlicke erve beweesen heeft
die somme van vijffhondert rijnsche gulden ende dat
om profijte vandien die voirsz. Willem Willemsz hem upgehouden
heeft mer als diie voirsz. Jan Willemsz tot zulcke
verstande gecomen is dat hij doir Godts gracie mit zijn
ambocht die coste wiste te gecrigen soe is hij buyten
getogen opdat doirdien zijn goeden van zijn moederlicke
erve souden vermeren ende oploepen soedat hij uut-
landich is geweest den tijt van zes jaeren ende heeft
mit zijn zuyeren arbeyt zijn cost gewonnen sonder
van zijn vader te genieten wairomme hij betaelinge
vandien begeert te hebben, gemerct dat zijn vader
tzelve den weeskinderen van Pietertgen voirn.
mueten uutreycken blijckende bij zekere verclaringe
dairvan weezende, want na alle recht zoe behoert
tgoet van de weeskinderen altijt sijn voirtganck te
hebben tot wasdom ende vermeerderinge vandien.
Concludeert dairomme Alewijn voirsz. gemachtich
als boven bij reden voiren verhaelt dat hij blijven
zal in zijn clachte. Des hij begeert vonnisse van
scepenen ende eerst hyerop gehoirt te wezen, makende
eyssche van costen. Actum den lesten dach in
Maerte anno 1525. Talman J. Roeloffsz
Meester Florys Willemsz priester als gemachtich van Willem
Willemsz Bont ende van Jan Heynricksz als mannen ende voichden
van hair huysvrouwen ende nyet voer hemzelven verwere
is zijn dincktael tegens Jacop Roeloffsz gemachtich van Jan
Willemsz eysscher ende nyet tegens Aellewijn Meesz gemerct
dat hij in die dinctael nyet genomineert noch present geweest
en is ergo soe is d'eysscher misnoettelt in zijn recht want
nyemant zijn scriftueren en behoert te maicken dan upten
genen die't recht angeleyt heeft mer sonder prejudicie
van die voirsz. exceptie seyt die verwere dat d'eysscher
in den name als boven met onrecht nomineert den /
boelhouwer gemerct dat hij consenteerde in zijnen eyssche mer soe
veer alst die verwere in den name als boven angaet, seyt dat d'eysscher
met onrecht die verwere eyschet die somme van vijff pont groten
t'sjaers ter cause van verlopen renten off dertich pont groot
daervoer te geven, gemerct dat d'eysscher nyet bewijsen en zal als
recht is dat zijn penningen up renten uutgestelt zijn off dat hem
yemant enige renten beloeft heeft, seyt voirt d'eysscher dat hem zijn
vader beweesen heeft voir zijn moederlijcke erve vijff hondert rijnsche
gulden, seyt die verwere dat d'eysscher dat nyet bewijsen en zal als recht
is dat hem zijn vader soe veel beweesen heeft, seyt voirt d'eysscher
dat hij ses jaeren uuytlandich geweest is ende zijn cost met zijn zuyeren
arbeyt gewonnen heeft sonder enich profijt uuyten voersz. boel te hebben,
seyt die verweere dat d'eysscher dat nyet bewijsen en zal als recht
is dat hij sonder enich profijt van den voersz. boel hem zelven die ses
jaeren buyten lants onderhouwen heeft. Concludeert die verwere
in den name als boven en doet d'eysscher zijn bewijs nyet van als
dat voorsz. staet dat scepenen dunct goet bewijs te wezen, mitgaders
dat ondoechdelijck inbrengen van die kenninck, dat hem die kenninck
mede zal gaen ende d'eysscher tegens. Des hij begeert vonnisse van
scepenen ende eerst met zijn meerseggen hyer up gehoert te wesen,
makende eyssche van costen. Actum den lesten dach in Maerte anno
1525. Talman B. Beys
Louis van Veenendaal
zei op maandag 22 juni 2020 - 09:34