Leeshulp gezocht

Wij Jacop Willem Jan Heyns zone ende Mijs Henricx sone van den Roethe, scepenen
in Bairle onder mijnen here van Nassou, ende wij Cornelis Philips Bollekens zone, ende
Jan van der Poort, scepenen onder den s'Hertoghe ende wij Jan Jacop Swanen zone ende
Mijs Henriccx zone van den Ruethe voirsz., leenmannen Jans van Wijfliet, oirconden
dat voir ons quam Heymerick Heinrick Heymericx zone, ende lide dat hij genomen
heeft tot eenen gerechten erven tegen Aerden Henrick Capkens sone in den name
ende als gemechticht zijnde van Thomaes van Wijfliet, schoutet tot Oisterhout,
voir hemselven ende de voirsz. Thomaes, in den name van Henricken ende Anthonissen
van Wijfliet, zijnen bruederen, die deselve Thomaes dairinne geloefde te
vervangen als blijcte bij eender percuratien besegelt mette stadtzegel van Antwerpen,
die ons de voirsz. Aert thoende ende liet zien, alle dese erffenissen ende goeden hier-
nae bescreven, te weten, in den yersten die huysinge, schuere, hondge ende
erfenissen met heuren toebehoirten, metten erve dairaen liggende, houdende drie
buynder, luttel min oft meer, oft alssoe groot ende alsoo cleyn alse gestaen ende
gelegen zijn tot Bairle toirdel neven s'heeren straet suytwairt, westwairt neven
Jan Wouter Anssems zoons erve, ende noortwairt neven de gemeyn acker, ende
oostwairt neven Wouter Maes zoons erve ende meer andere, item moch een stuck erfs.
gelegen tegens de voirsz. huysinge overhoudende anderhalf buynder, luttel min
oft meer, gelegen neven s'heeren straet noortwairt, oostwairt neven Anthonis
erve van den Ruethe, suytwairt neven de water zoo, ende westwairt neven Jan
Wouter Anssems zoons erve ende meer andere, item noch een stuc erfs metten
grachten dairaen liggende, geheyten die Lairacker, houdende een buynder, luttel
min oft meer, gelegen neven Jan Peter Thijs erve ende meer andere westwairt,
suytwairt neven Claeus Canters erve ende noortwairt neven s'heeren strate,
item noch een stuc beemden, houdende omtrent vijf oft zesse voeder hoymade,
luttel min oft meer, gelegen tot Bairle opt broeck, neven de marck, oostwairt
ende noortwairt neven Cornelis Reyns erve, item noch een stuc moers metten
erfgronde, houdende een half buynder, luttel min ofte meer, gelegen westwairt
ende noortwairt neven Pauwels Willem Jan Thiels soons erve ende oestwairt
neven den waterlaet, om vyer zester rogs, t'sjaert erffgoet ende cusbair
te gelden ende te leveren jairlicx ende erffelicx opten onderpandt metten maten
van Breda op onser Liever Vrouwendach Lichtmisse, te vrijen ende te
waren, te weten t'stuck moers voirsz. met eenen halfter rogs t'sjaers erffelic
dair erfelic voir uutgaende ende te vrijen ende te waren, dese huysinge
ende alle de andere erfenissen voirsz. metten erfpacht voirsz. ende met eenre viertel
rogs erfpacht ende met twee capoen efchijns alsoe verre alse dair
sculdich zijn uut te gaen dair erfelic voir uutgaen. In oirconde
desen brieve met onsen zegelen besegelt, een yegelic van ons alsoe
verre als wij wijsers zijn int jair ons Heeren duysent vyer hondert
drieentnegentich elf daige in Decembri.