https://archief.amsterdam/indexen/deeds/d632cc92-1fee-45dd-8680-b5375b59b21b

Wij Albert Cantert Dircxz ende DSirck Florisz, schepenen
in Amstelredamme, oirconden ende kennen dat voir ons quam
Jacob Jansz ende geliede vercoft, opgedragen ende
quijtgeschonden te hebben Jan Willemsz, zijnen vader,
t'sevendeel van een huys ende erfve, staende in de
Warmoesstraet, daer lendenen off sijn Mathijs Mathijsz
aen de suytsijde ende Govert /
Jansz Hudecooper aen de noortsijde, streckende voir van der
straet tot achter an den amrack toe, in allen schijne
alst dair nu ter tijt gelegen es ende betimmert staet,
ende hij geliede dairof al voldaen ende wel betaelt
te wesen, den lesten penninck mitten eersten, soedat hij
dairomme beloofde den voorsz. Jan Willemsz, zijnen
vader, t'zevendeel van t'voorsz. huys ende erve te
vrijen ende vrij te waren jair ende dach, als men
in gelijcken schuldich te is doen, ende alle oude
brieven of te nemen, uytgeseyt van drie dordrechtsche
schilden jairlicxe onteygen, staende op den gehelen huyse
ende erfve voorsz., nair inhouden de principael
pachtbrieven dairof sijnde, welverstaende dat Duyf
Jansdochter, weduwe van wijlen Adriaen Ockertsz,
zijn grootmoeder, t'selve huys hooren leven lanck gedurende
sal mogen gebruicken, sonder arch ende list. In
oirconde desen brieve besegelt mit onsen zegelen.
Gegeven opten twaelften dach in Julio int
jaer ons Heeren duysent vijfhondert vier ende tzestich.
Onder stont geteyckent E. Woutersz.