Wij burgemeisteren, scepen ende raith der statt Nijmegen doen kondt ende
kennelick allen denghenen dye desen onsen openen placaet sullen syen off horen lezen
openbairlick voir dye rechte wairheyt certificerende, dath op huyden date van desen
voir ons erschenen ende gekomen sijn Johan van Campen, Gerit Vele ende Johan
Verheggen Geritssz, ende hebben voir ons durch dwanck deser rechten getuyght,
gesacht ende myt opgerechten vyngeren gestaefften eeten lyfflick then heyligen gesworen
als hyerna beschreven volght, in den irsten hefft Johan van Campen vurschreven getuyght,
alt umbtrynt vijfentseventich jaren, woe dat hij tot Wychen geboren ys, ende den
alden Jacob van Galen zeliger dye een heygreeff toe Wychen wass yn zijnen leven,
seer waell gekent hefft gehadt, ende dairnae, nae sijne doid, Rutger van Galen, zijnen
soen zeliger, oick yngelicken als vurschreven, ende dat oen waell wyttich ende kundich ys
dat dye nabuyren ende geerffden van der Tirschen in den scependomb van Nijmegen
geseten ende ingelicken dye nabuyren ende geerffden langhe dye Berendonck ende
daer ommetrynt int selve scependomb geseten altijt bij tijden zelige Jacobs van Galen
ende Rutgers, sijnen soense vurschreven, voer ende oick nae bij tijden Jacob van Galen ende
volgenten des itzigen heren tott Batenborgh als heygreve gewoenlick geweest zijn,
dye Wychensche heide toe gebruycken, myt weyen, vlaggen toe houwen ende torff
toe steken, gelick dye nabueren van Wychen selffs deden, doch bij alzoe dat dyeselve
nabuyren ende geerffden van den Tyrsch ende scependomb vurschreven den heygreven dair-
van een kentenyss ende lijgsnyss jairlicx deden ende andere nymanten, voirt
hefft Johan Verheggen vurschreven getuyght, alt ombtrynt vijftich jairen, woe dat hij toe
Wychen geboren ys, ende zelige Rutger van Galen als een heygreve wael gekent
hefft, ende dat oen waell wyttich ende kundich ys, dat dye nabuyren ende geeffdenen
van den Tirsch in den scependomb van Nijmegen geseten ende ingelick langhe dye
Berendocnk ende dair umbtrynt int scependomb gelegen, altijt gewoenlick geweest
zijn bij tijden zeliger Rutgers van Galen voir ende oick nae bij tijden Jacobs van Galen,
sijns soens, ende volgenten des itzigen heren tott Batenborch alls heygreven dye
Wychensche heide toe gebruycken myt weyen, vlaggen toe houwen ende torff toe steken,
gelick dye nabuyren van Wychen selffs deden, beheltelick doch dath dyeselve nabuyren
ende geerffden van den Tirsch ende scependomb vurschreven den heygreven jaerlicx eenen kentenysse
ende ..nisse dair van deden ende anders nymanten, ende want wij burgemeisteren,
scepen ende raith der statt Nijmegen vurschreven dyt aldus ende wol vurschreven gehoert
hebben, soe hebben wij des toe oirkonde der waerheit onser statt secreet segell op
spatie van desen doen ende heiten drucken op guldessdach ipso presentationis Marie
Virginis anno 1554.
Henk de Kleijn
zei op dinsdag 9 augustus 2022 - 20:16