Machtelt Andriesdochter is hair dingtael tegens Andries Hugensz ende Zeger Hugensz ende Machtelt
voirsz. die seyt dat zij die verweerders te recht heeft doen dagen ende beclagende dat zij stuten zullen moeten
te leveren eenen de scepenen brieff, roerende van een vierendeel van een huys ende erve gelegen up die Steenschuer
die Alteyt Andriesdochter gemaect ende besproecken heeft Machtelt Andriesdochter hair suster voirn.
nae uuytwijsinge die maeckbrieff die die verweerders onder hebben of up tgene dair voir te geven staen
off Andries ende Zeger seggen willen dat Machtelt voirn. Alijt hoir suster hair niet gemaact en
zoude hebben, of dat den maeckbrieff niet en specificeert dat de eysschersse een vierendeel van den
huyse hebben zoude dair up zoe seyt die eysschersse dat zij hair gedraget an de maeck-
brieff wes die specificeert dair hout zij hair an dat dit sculdich sal wesen te geschieden ende dat
hair die kenning sal gaen an die verweerders tegens ende dat dit recht is des zij begeert vonnisse
van scepenen ende eerst hierop gehoort te wesen. Actum 4 dagen in October anno 1511 ...
Andries Hugesz ende Zeger Hugesz is hair dingtael tegens Machtelt Andriesdochter ende
seggen dat Machtelt voirsz. hemluyden mit groten onrechte hebben doen dagen ende beclagen om van
hem te hebben eenen scepenbrieff, roerende van een vierendeel van een huys met zijnen erve
gelegen op die Steenschuer dat Alijt Andriesdochter hair besproecken ende gemaect heeft,
antwoirdt Andries ende Zeger ontsculdich van dien eyssche ende dat bij deseredenen: ten eersten
zoe heeft desen brieff dair questie of is onder die testamentens van Alijt Andriesdochter
saliger memorien wairom dat Machtelt sculdich is toe te sprecken die testamentens ende
niet ons, ten andren zoe heeft zij copie uyt den brieff die zij eysschende is, ten derden
zoe besit zij dat vierendeel van den huyse sonder yemants weederseggen, ten vierden zoe leyt
desen brieff onder die testamentens alzoe wel tot hoire behoeff als tot onsen behouff alzoe den
brieff ons allen angaet. Ende zij heeft mitter makinge ende mitter scheydinge dat bij den
testamentens gedaen is wel te vreden geweest ende zij en sal dair niet of connen bewijsen, t'en
is alzoe als voirsz. staet, concluderende. den voirsz. Andries ende Zeger dat alle datgene dat
Machtelt voirn. doet dat zij dat mit groten onrecht doet ende dat hair die kenninck mede
sal geven ende Machtelt voirsz. tegens, des zij begeren vonnesse van scepenen ende eerst hierop
gehoort te wesen. Actum den 4e in October anno 1511. Tielman Baltazar Beys.
Aldus soe wijsen scepenen indien Andries ende Zeger voirsz. zweren willen als recht is dat zijluyden
gheen brieff en hebben roerende van tvierendeel van thuys ende erve gelegen upte Steenschuyer dat alsdan
Alijdt Andriesdochter in horen leven toebehoirde dan alleenlick dat testamente van Alijt voirsz. dat alsdan
Andries ende Seger vrij ende quijt sullen wesen van Machtelt voirsz. eysscch ende ansprake ende geven Andries
ende Seger voirsz. die kenning gewonnen ende Machtelt voirn. verloren ende indien Andries ende Zeger niet en
zweren dat voirsz. is soe sullen Andries ende Seger dat voirn. Machtyelt voldoen van horen eyssch
ende geven dan Machtelt voorsz. die kenning gewonnen ende Andries ende Zeger voorsz. verloren. Actum
21 dagen in November anno 1511.
Is gewesen dat zijluyden horen eedt doen sullen binnen 14 dagen naestcomende ut supra.
Machtelt heeft hemluyden den eedt verdragen. Actum 12 dagen in December anno voorseyt.
Louis van Veenendaal
zei op zondag 7 juni 2020 - 08:36