Eigendomsbewijzen van 4 morgen land in Gelderswoude in Zoeterwoude, 1528. 1528

Deel 2

Deel 3

Hier mijn transcriptie van de drie delen:

deel 1
Ick Ghijsbrecht van Zwieten, ambochtsheer ende schout in den ambocht van Zoeterwoude, doe kondt allen luyden dat voor mij quam Cornelis Wouter
Gerrytsz in de Weypoert, geliede ende bekende hoe dat hij heeft mits Heynrich Michielsz, priester legitende een campe lants ofte wildernisse,
te samen ongedeylt ende ongescheyden van zeventhiendalve morgen lants bij den hoop, sonder maet, gelegen in den ambocht voirsz. in Gelders Wouden-
broeck, streckende van den broeckwech tot Louwerije Willemsz lant toe, belegen die zuytzijde Louwerije Willemsz voirsz., die noirtzijde heer
Heynrich voirsz. gehieten die Roetgert ende zijn up datum van desen gedeylt ende gescheyden dat heer Heynrich voirsz. van den voirsz. Lauen off toe-
behoren twaelff morgen lansts sijnde Cornelis Woutersz voirn. vijftalff morgen lants ende al bij den hoop, sonder maet, van welcken
vijftalff morgen lants voirsz. Cornelis Woutersz voirn. lijdt ende bekent dat hij vercoft heeft Heynrich Michielsz, priester voirn. twee
morgen lants bij den hoop, sonder maer, gelegen in den ambocht voirsz., belenden als voiren, welverstaende dat heer Heynrich voirsz. nu
comt met zijn lant ende is streckende van de zeecant an tot an Cornelis Willemsz lant toe, off tot an die dwerssloot dair Cornelis
Willemsz voirsz. lant an comt, streckende van de broeckwech tot an die wildernisse voirn., behoudelijck dat Cornelis Woutersz voirsz.
sel die twee stroken lants, streckende van elcke zijde van Cornelis Willemsz lant voirsz. van de wildernisse tot an die broockwech
voirn. behouden voir derdalff morghen lants bij den hoop, sonder maet, ende Cornelis Woutersz voirsz. ende Wouter Gerrtisz, zijn vader, als wairborch
geloven mit gesamenderhant ende elcx een voir als dese voirsz. twee morgen lants, in manieren voirsz. heer Heynrich voirsz.  vrij te waren
jaer ende dach a;s t'recht is ende alle commer of te doen die dair  nu ter tijt up staet, als men vrij lant ende eygen erven sculdich is te waren, ghe-
lijcken buyrlant in den ambacht daer't gelegen is, ende waer't sake dat Heynrich Michielsz, priester voirsz., off zijn nacomelingen enich gebreck,
hinder. scade an der voirsz. waringhe hadde, dat soude hij  mogen ypoteeck verhalen an een  weer lants van vierthalven morgen
gehieten dat Blootlant dat tot een onderpant staet, gelegen in den ambocht voirsz., streckende van den ommedijck tot Zoeterwouder wech
toe, belegen an die noirtzijde Heynricj symonsz. ende Gerryt Meesz, an die zuytzijde Claes Claesz, ende zijn voirwaerden dat heer Heynrich
voirsz. of besitters des voirsz. lants vrij sal mogen varen, bruycken ende bezygen die sloten streckende van den broeckwech tot an
Heynricx lant toe, ende over Cornelis Woutersz voirsz. lant gaen wegen dat scip ofte andere indient noot zij  des so sel heer Heyndrich
voirsz. off zijn nacomers die voirsz. sloot helpen maken als zij gebreck hebben om t'hont lant te varen ende Cornelis voirsz. ge-
looft Wouter voirn. hier off scadeloos te houden, van welcke coop Cornelis Woutersz voirsz. lijdt ende bekent wel voldaen ende
betaelt van Heynrich Michielsz, priester voirn., den lesten  penninck mitten eersten. alle dinck sonder argelist. In kennisse der wair-
heyt so hebbe ick Ghijsbrecht van Zwieten, ambochtsheer ende sout in den ambochte voirsz. desen brieff bezegelt mit mijn selfs
zegel ende hier onder an gehangen, dair an, bij ende over waren als tuygen Willem Engebrechtsz ende Cornelis Gerrytsz int jaer ons
Heren duysent vijffhondert negen ende twintich upten vijfthienden dch in Maerte.

deel 2
Ick Ghijsbrecht van zwieten, ambochtsheer ende scout in den ambocht van Zoeterwoude, doe kondt allen luyden dat voor mij quamen Dirck Jansz,  Mathijs
Cornelisz, Cornelis Cornelisz, Willem Vranckenz als erffgenamen van Marritgen Cornelis Gerrytsz huysvrou saliger gedachten, lijen ende bekennen dat zij mit
gesamenderhant vercoft hebben Heynrich Michielsz, priester ende Cornelis Fredericxz vier morgen lants, genoemt de Roetgaert mit ander wildernisse dair after an,
bij den hoop, sonder maet, also die gelegen zijn in Gelderswou in den  ambocht van Zoeterwoude voirsz. ende is streckende uuyt die vliet tot Coman Pieter Janszoen
lant ende is belent an die noirtzijde Jan Claesz die Vries mit meer ander ende an die zuytzijde Louwerys Willemsz  Lickebier en Heynrich Michielsz voirsz. ende Dirck
Jansz Mathijs Cornelisz, Cornelis Cornelisz ende  Willem Vranckenz voirsz., geloven mit gesamenderhant ende elcx een voir al, dese voirsz. landen in manieren voirsz. vrij
te waren jaer ende dach als t'recht is na den rechten van Rijnlant, gelijcken buyrlant ende all commer off te doen die dair nu ter tijt up staen, uytwijsende drie pont hollants
t'sjaers ewighe pacht ende behoert toe dat godshuys tot Zoetermeer ende noch zeven pont hollants t'sjaers ter losse den penninck mit sestyen ende indien hieromme
gebreck ander voirsz. waringhe geboerde, so heeft Cornelis Gerrytsz als wairborch dari onder geseth als ypoteeck an te verhalen twaleff morgen lants mit
huysingh, bargh ende potinghe als dari nu ter tijt up staen, gelegen in den ambocht van Zoetermeer ende heeft belegen die broeckwech an die westzijde ende an
die nortzijde die Zegwaertze wal, and die oestzijde Engelbrecht Cornelisz, an die zuytzijde Drick Keyser ende Pieter Louwenz, van welcke coop
Dirck Mathijs, Cornelis Willem voirn. lijen ende bekennen t'samelijcken vernoecht, wel voldaen ende betaelt te wesen, den lesten penninck mitten eersten.
Alle argelist uutgesondert. In kennisse der waerheyt so hebbe ick Ghijsbrecht van Zwieten, ambochtsheer ende scout inden ambocht van desen
brieff bezegelt mit mijn zegel ende hier onder an gehangen, dair an, bij ende over waren als tugen Joest Wouterz ende Symon Heynrichz, int
jaer ons Heren duysent vijffhondert acht ende twintich upten achtyenden dach in October.

deel 3
Ick Cornelis Vredericxz tot Zoeterwouyde bekenne ende belijde mits desen
alsdat ick overgegeven hebbe ende geve over alsulke anseggen ende coop als ick
hebbe gehadt an een stuck lants genoempt die Roetgaert, gelegen in gedersande,
Henrick Michielz, priester, dat welke stucken landts ick Cornelis vorin. mit
henrick M. voirn. t'samen gecoft hadden ende belove voir mij ende mijnen
nacoemelingen daerin niet meer nae te talen voir al welke overgevinge
ende ontruyminge ick Cornelis Vrederixz voirn. bekenne mij wel voldaen
ende betaelt te wesen ende oeck voir alle moyten ende arbeyt die ick om
lands wille gehadt hebbe. Alle dinck sonder arch off list. In kennisse
des waerheyts sien hier tuygen ende sexluyden over geweest Aerent
Dircxz tot Zoetermeer ende Jan Scuytemaeker tot Segwaert die dit mit
hair handt onderteykent hebben ende ick Cornelis Vrederixz voirn. tot
meeder sekerheyt hebbe dit selfde oeck onderteykent ende gesciede anno XV
XXVIII op den XIIten dach in Decembri.

Hartelijk dank!