Wij, deecken ende capittel der kercken van Sinte Lambrechts binnen der
stadt Luyck, overpeynsende ons te betaemen sorghe te draegen ende daerbij
behoorlijck devoir te doen, dat onse ondersaten van Lytte beneden
opte rivier van Maesen, met den goyen ende gronden van erven
binnen den limiten ende palen aldaer gelegen, (ende den perickel
van den water zeer subject ende onderworpen) daervan behoyet
ende in goeder securiteyt bewaert mochten blijven, ende in sulcker
voughen met goeden dijecken, sluysen ende waterloten gestelt,
dat dieselve sonder achterdrach off vreese in tijde van eenyghen
grooten water off inundatie, raftelijck ende vruchtbaerlijck
beseten gebruyckt ende gepossideert mochten wordden, doch
anschouwe nemende dat sulcx nyet wel en is te vermoeden, ten-
zij dat alle straeten, steghen, dijecken, sluysen, zijlen, graven,
waterlaten, duynen, heeckens ende anderen heymtenighen binnen
den voorsz. onsen dorpe gelegen, gerepareert, gebauwet ende met
goeder versinnicheyt onderhouden wordden dan zij tot noch toe,
overmits die cleynicheyt van den penen ende amenden daerop
gestelt, sijn gerepareert ende onderhouden gheweest, tot grooten
ende merckelijcken schaden ende achterddeel, soe van onser kercken
goyen, als oyck der ingesetenen ende den geërffden, hebbende
oyck verstaen van noode te wesen politie te statueren op eenige
nootsaekelijcke dingen tot welvaert van onsen ondersaeten, aengaende
den maten, ghewychten ende dyergelijcken, waerduer te vermoeden
staet veel bedrochs ende ondrechtverdicheyts binnen onsen dorpe
gecommitteert te werden, willende op al behoirlijck
versien ende voor den toecomenden tijt remedie ende provisie stellen,
hebben gestatueert ende geordineert, statueren ende ordineren als
hiernae volcht:
In den iersten dat van nu voirtaen op Sinte Lamberechtsdach
des heyligen martelars een yeghelijcken jaers die ingesetenen
ende onderdanen van Lytte benne voer middage in der kercken
(naedat der dienst Goidts aldaer sal wesen gedaen) vergaderen
seelen, om uuyt henne vier beqwaeme manspersoenen
van den eerbaerlijcksten ende orbaerlijcksten voer gezworen
des toecommende jaers genoempt ende gedeputeert te wordden.
Maer van die twee bij onse officier off schout van Lytte
ter tijt wesende, off zijnen gecommitteerden tersaeken van sijner
Jos Cuijpers
zei op donderdag 3 maart 2022 - 10:28