Maximiliaen, bij der gratien Goids, roemsconinck, altijt vermeerdere des rijcs, ende Philipe, bij derselver gratien eertshertogen /
van Oisterijcke, hertogen van Bourgoinginen, van der Lothe, van Brabant, van Lymborch, van Luxemburg ende van Gledrte, coemen van Vlaenderen, van Tyrolle, van Artois, van Bourgoingnien, /
palatinen van Henegouwen, van Hollant, van Zeellant, van Namen ende van Zuytphen, mercgreven des heyliche rijcs, heren van Vrieslant, van Salins ende van Mechelen, doe /
condt allen luyden dat wij uuyt sunderlinge gunsten die wij hebben ende dragen tot onsen geminden in Gode die bruederen ons Goidshuys van Sinte Aeghten in onsen lande van /
Kuyck gelegen, ende om die devotie die wij hebben totten heyligen maeght, Sinte Aeghten hoeve patronesse, ende opdat die voirsz. bruederen te bat gehouden sullen wesen onsen /
lieven Heere God te bidden voer die zalicheit ende welvaert van ons ende van onsen gemeynen lande ende voer die zielen onser vorvorderen zaliger memorien, ende oic van onsen /
nacomelingen hertogen ende hertoginnen van Brabant, ende besunder voer die zielen van wijlen onsen lieven ende zeere geminden geselinnen der hertoginnen ende van vrouwe Kathlijnen /
van Bourbon in heuren leven hertoginne van Ghelre, dien God genadich zij, ende om te bat hoeren last nae hoeren staet te moigen omme te houden, hebben den voirsz. bruederen in den goidshuyse /
om Goidswille te vorsten ende in gerechter aelmoessenen ghegeven ende verleent ende mit desen onsen brieve gheven ende verleenen die vrijdicheyt ende admortisatie van dat /
halferve dat een leen was geheyten den Doyenborch gelegen in den kerspel van Kuyck, weert wesende jaerliycx vive off zesse croenen off daer omtrent, ende hebben voerts voer /
ons onse erven ende nacomelingen hertogen ende hertoginnen van Brabant t'voersz. halferve geadmortizeert ende gevrijdt , admortiseren en vrijen van onse manschap ende /
van allen anderen weerlijcken lasten ende diensten tot eewigen daighen om den voersz. bruederen ende goidshuyse dier voertaene te gebruycken ongelast sonder ons off onsen nacomelingen /
enigen dienst off manschap [papierschade] te doene in eeniger manieren, behoudelic financie ter tauxatie van onsen lieven ende getrouwen cancellier van Brabant off van den luyden /
van onsen rekeningen te Bruessel ende dat zij ons jaerlijcx gheven ende betalen sullen in de handen van onsen rentmeester dient behoeren sal altijt op Sinte Mertttensdach /
in den wynter eenen erfchijns van twee capuynen denwelken wij willen ende oic bevelen denselven onsen rentmeester in onsen thijnsboecken ter eewiger memorien onder t'capittel /
geminder gesellinen ende vrouwen Kathlijnen van Bourbonjaerghetijde mit vigilien daer aff zij ons sculdich sijn te gheven hirtoe behoerlijcke contre brieven bezegelt mit /
hoeren zegel ende die leveren opter camtoer van onsen rekeningen voerscreven tot eewigen memorien, ontbieden daerom ende bevelen onsen drossaete ende stadthouder /
van onsen leenen van Brabant, onsen secretaroes ende verwaerders van onsen leenboeken ende allen anderen onsen wachteren, stichteren, dieneren, mannen van leen ende /
ondersaten nu ende oic naemaels wesende, ende allen anderen dien't aengaen mach, dat zij den voersz. bruederen ende goidshuyse onser voersz. gratien ende verleeninghen /
rustelic ende vredelic doen ende laeten gebruycken, houdende t'voersz. halferve vrij ende ongelast van onser manschap ende allen anderen wettelijcken lasten ende diensten /
opten voergenoempden erfchijnse van twee capuynen, sonder hen daertegen te doen off te laeten geschien enninge hynder, commer off letsel, nu off in toecomende tijden /
in eeniger manieren, ende dat onse voersz. secretaires ende clerck van onsen leenboeken t'selve halferve die uuyten selven onsen leenboeken te dien eynde dat die
voersz. bruederen in toecomenden tijden voer dit manschap daer aff onnervolght ende ongepraempt moigen blijven, ende des niet en laet want wij't alsoe gedaen /
willen hebben [deel onleesbaar] hebben wij onsen zegel aen desen brief doen hangen. Gegeven in onser stadt van Bruessel opten zeventyensten dach der maent
[rest verwijnt in de vouw onderaan]
Carina Wagenaar
zei op dinsdag 27 februari 2024 - 15:55