Charter 1468

Cont ende kenlijck zij allen denghenen die desen brief sullen sien of hoeren lesen, want ick Jan van Arkel als stadhelder, Goessen Heyms, rentmeester mijns genediche heren s'hertogen van /
Bourgondie ende van Brabant ... in zijner stadt ende Meyerijen van s'Hertogenbossche, dairtoe gecommitteert van mijnen voirsz. genedigen hertoge mit zijnre genaden oepenen besegelden brieven /
in fauten ende gebreke van betalingen geweest hebbende van negenthien penningen nys gelts grontchijns, die mijn voirsz. genedige heere jairlix ende erffelijck geldenden heeft uut zekeren /
erffenissen Wilem Claes Brabants toebehoerende, voirtijts Kathelijnen, wedue wijlen Wouters soen van Arnt Engbrechts van Vucht, gelegen in der prochien van Helvoirt, gelijck dat in mijns /
genedichs heeren chijnsboecken volcomelicker begrepen is, ende want ick Jan van Arkel stadhelder voirsz. totter betaelingen des voirsz. grontchijns niet gecomen en konde overmits dat niemant /
die voirsz. erffenisse en bruycte noch aen en veerde, soe hebbe ick als stadhelder voirsz. in den name van mijnen voirsz. genedigen heere die selver erffenisse met drien  Sondaigsgeboden in der /
prochiekercken van Helvoirt ende oick in der stad van s'Hertogenbossche dair men die geboden gewoenlic is te doen, doen veylen te vercopen, ende want bynnen die tijt den voirsz. grontchijns /
niet betaelt en waert, soe hebbe ick Jan van Arkel stadhelder voirgeschreven dairnae op enen anderen Sonnendach in der voirsz. prochiekercken ende in der stad van s'Hertogenbossche ter plaetsen /
voirsz. enen roepdach van der voirsz. erffenisse doen leggen, op welken roepdach quam Ghijsbrecht Dirck Harmen soen, vorster tot Helvoirt ende Bertram Janssoen knape ende diener /
der stad van s'Hertogenbossche aldair vore mij Janne van Arkel stadhelder voirsz. ende mijne genedichs heeren mannen van lene, te weten Jannen Monx, Melize van Borchem, Rutgeren van /
Arkel ende Arnden Pels ende tuychden aldair op heur eede, dat dese voirsz. erffenisse in der voirsz. prochiekercken ende in s'Hertogenbossche ter plaetsen voirsz. geveilt weere ende dairaf eenen /
roepdach geset, alsoet't boven verclaert is, alsoe dat ick Jan van Arkel stedehouder voirsz. vraechden of dair yemant weere die dese voirsz. erffenisse quiten woude voer mijns genedichen /
heeren grontchijns ende gebreken ende voer den outraet die dair met recht op gegaen weere ende gaen soude eenwerf, anderwerf, dordwerf ende vierdwerf, ende want dair /
nyemant en was die dese voirsz, erffenisse quijten woude, doen maenden ick Jannen Monx, een van den mannen mijns genedichen heeren voirsz., wats voirt van rechts /
wesen soude, welke Jan Monx hem beziet ende hem beraden hebbende,  wijsde hij mit gevolge der voorsz. andere mannen dat men dese voirsz. erffenisse vercopen soude voer /
mijns genedichen heeren grontchijns ende gebreken ende voer den onraet voirsz. ende liep dairover men soudt wederkeeren ende gebreeck dair men soude voirt manen /
alsoe als recht weere, dese punten aldus geschiet sijnde, soe vraechden ick voirt off yement dair gelt om gheven woude, dair quam Claes Wouterssoen van den /
Staeck ende boet dairomme mijns voirsz. genedichen heeren grontchijns metten afterstede jairlix ende erffelijck te gelden ende den onraet die dair met recht op gegangen /
weere ende gaen soude, ende dairtoe alle pachten, chijnzen ende renthen dairuut van rechts gaende jaerlix ende erffelijck ende noch die somme van achtende- /
twintich rijnssche guldens eens te betaelen, voert soe vraechden ick off dair yemant were die dairmeede om gheven woude eenwerf, anderwerf, dordwerf ende /
vierdwerf, ende want dair nyemant en was die dair meer om boet of gheven woude dan Claes voirsz. , doen maenden ick voert Jannen Monx, een van de mannen /
voirsz. wat ick den voirsz. Claessen sculdich were te doen, welke Jan Monx hem  voirt beriet ende hem beraden hebbende wijsde hij vonnislike met gevolge der voirgeschreven /
andere mannen, want dair nyemont meere om gheven en woude, dat ick ende voirsz. Claessen den coep van der voirsz. erffelicke gheven soude, alsoe als recht were nae /
welken vonnisse alsoe gewijst, soe gaff ick Jan van Arkel stadholder voirsz. den voirgeschreven Claessen den coepe van der erffelike voirsz, gelovende dairaff in den name van mijnen /
voirsz. genedigen heere denselven Claessen wairscappe, gelijck een rentmeester van s'Hertogenbossche of zijn stadhouder dat gewoenlic is te doen ende hebben denselven  Claes /
dairaff geset ende geregistreet opten voirsz. grontchijns in mijns genedichen heeren chijnsboecken, alsoe dat gewoenlic is. In kennisse der wairheit soe hebbe ick Jan van /
Arkel als stadhelder, Goessen Heyms, rentmeesters voirsz. mijnen zegel aen desen brief gehangen, ende hebbe voirt versocht van mijns genedigen heeren wegen voirsz. die /
mannen van lene voirgeschreven hoeren zegelen hieraen te hangen, ende want wij Jan Monix, Melis van Boerchem, Rutger van Arkel ende Arnt Pels, mannen van lene /
voirsz. ten versuecke Jans van Arkel stadholders voirsz., dairaen ende over gestaen hebben dair alle punten geschieden gelijck voirsz. steet, soe hebben wij des te /
orkonden onse segelen bij des voirsz. stadholders zegel oick aen desen brief gehangen, dit waert gedaen ende gegeven opten derthiensten dach der maent /
van Maerte int jair ons Heeren duysent vierhondert acht ende tsestich.

Dankjewel geert!

@Geert, nog twee details in je prachtige transcriptie: in r. 2 staat er achter Brabant de afkorting etc., et cetera. De naam Jan Monix staat beide keren echt als Monix gespeld, het is een schepen van de stad Den Bosch die wel vaker voorkomt in vragen op dit forum rond het Bosch' Protocol.