Akte uit het OGA-Merksem van 25-09-1600

Wij Aerdt Schoyte ende Jacob van Palen mannen van leene
s'hoofs van Mercxem, doen condt ende kennelijck alsoe
Jacob ende Willem Ghijsels ende Jan Verbeke, als getroudt
hebbende Barbara Ghijsels, bij procedure van besetselen
int voor ende najaer met alle behoorlijcke ende gewoonlijcke
genachten, acten ende solemniteyten nae deser bancken ende vierscharen
rechte uutgewonnen hadden sekeren speelhoff metter erve,
gronde ende toebehoorten, achtergelaten bij wijlen Jan Baillet,
te weten een stede met huyse, hove ende een cleyn bosken
nu aerdt sijnde, groot ontrent twee gementen, gelegen tot
Mercxem in de Linenstrate tusschen t'goet van Ruysvoort
der joncvrouwen in den Pellicaen toebehoorende aen d'een sijde, ende
Cornelis Happaert goet aen d'ander sijde, te leen ruerende
van desen leenhove van Mercxem na luyt van den leenboecke folio 19
ende daertoe noch het gemet lants ombegrepen achter
vast aen den voorsz. bogaert gelegen met eender grachte tusschen
beyden afgegraven, ende dat al ombegrepen der maten
ende sonder eenige mate oft huysinge toe te seggen, dan soo ende
in sulcker grootte ende gesteltenisse als t'voorsz. huys ende goet
gestaen ende gelegen is, ende dat voor t'gebreck ende omme
te hebben indemniteyt van de verloope van vier veertelen rogh
erffelijck van de acht veertelen rorgher selver die Roelant de Prince
uuyten name van sijn huysvrouwe daerop ende op den pandt genaemt Den Vogelpoel ende op
meer andere panden bij erfgennige heffende is ende welck
verloop sij uuytwinderen als proprietarissen van de voorsz. Vogelpoel
hadden moeten opleggen ende betalen, behoudelijck hij verhael
metten costen van rechte daeromme gedaen ende geleden ende oock de
costen der voorsz. uutwinninge ende des dien aencleeft, soo is de
voorsz. stede met huyse, hove ende lande na voorgaende uutwinninge
ende dachnedinge ende mitsdien datter nyemant en quam noch
int voor noch int najaer eenich recht daertoe vermetende
den voorsz. uutwinderen voor t'voorsz. gebreck met vollen
rechte gelevert met russche, met rijse, met clepel, met
clincke met natte, met drooge, met hooge, met leege,
met gronde, bodeme ende allen den toebehoorten, omme de-
selve te houden, te besitten ende te gebruycken als hen eygen ende
uutgewonnen goet voor hen ende hennen nacomelingen ten
eewgen dagen, behoudelijck dat sij deselve bijchieringe nae
dry voorgaende Sondaechsche kerckgeboden d'een achter den
anderen volgende ten hoogsten verdueren metten uutgange van de
berrende keersse souden brengen tot vercoopinge, al volgende /
de vonnisse bij ons ende onse mede leenmannen ter manisse
des stadthouders daerover gewesen, welcken achtervolgende
de voorsz. stede met huyse, hove, lande, gronde ende
toebehoorten na voorgaende ende gewoonlijcke kerckgeboden
ende proclamatien ter behoorlijcke chieringe gebrocht sijnde,
is daeraff op den tweeden April in den jare 1599 metten val
ende uuytgange van de berrende keerse cooper gewerden Sebastiaen
Penel als leste ende hoochste verdieder tot behouve van de
voorsz. Jacob ende Willem Ghijsels alsdoen beyde present ende
accepterende, boven de vier veertelen rogh erfelijck nabescreven
voor ende omme noch de somme van een hondert eenendertich
guldenen eens, na luydt van de coopcedulle daervan sijnde
ende omme den voorsz. Jacob ende Willem Ghijsels dievolgende
daerinne te goedene, t'ervene ende te vestigene soo dat na
deser bancken recht behoort ende schuldich is te geschiedene,
soo eest dat de voorsz. stadthouder uut crachte van sijnder
officie die voorsz. stede met huys, hove, lande, grond ende
toebehoorten gelijck voorsz. is opgedragen, gecedeert ende
getransporteert heeft, droech op, cedeerde ende transporteerde
mits desen den voorn. Jacobe ende Willeme Ghijsels ende tot heure
nacomelingen behoef, met allen den rechte dat de voorgaende
eygenaer daeraen hadde ende houdende was, ende bekende dat
deselve geen recht meer daeraen en behielt, ende dit op den
commer ende last van vier veertelen rogh erfelijck den voorn.
Roelande de Prince als getroudt hebbende jouffrouwe [open plek]
t'Seraerts die den cooperen aen den coop nyet en corten
ende anders nyet, behoudelijck dat de
voorsz. goeden noch mede pant sijn ende blijven over de resterende
vier veertelen rogh erfelijck den voorn. Roeland de Prince uuyten
name van sijne huysvrouwe die men jaerlijcx gellende ende betalende
is uuyten voorsz. Vogelpoel, sonder cost, last oft schade van de
voorsz. vercochte goeden, al na luydt van de voorsz. coopcedulle,
sonder argelist, ende behoudelijkc den leenheer sijnen rechte, ende
want hiertoe geschiet is al datter na den lantrechte ende deser bancken
recht schuldich was toe te geschiedene ende egeen poinct van rechte
ende gewoonte daertoe dienende hierinne achtergelaten en is, soo
hebben wij leenmannen bovengenoempt in kennisse der waerheyt des
letteren besegelt met onsen segelen, gegeven int jaer ons Heeren als men
schreeff duysent ende sessehondert, vijfentwintich dagen in
Septembri.
G. Suyers

Hartelijk dank Geert!