1613- Heir,

In den naem ons Heeren amen. condt ende kenlijck sij allen dengenen die dit jegenwoordige instrument sullen sien off hoeren lesen, dat in den ... /
jaere na de geboorte ons Heeren duysent sesse hondert ende dertien, in de elffde indictie, op den sevenentwintichsten Aprilis, reguerende die hoochgeboeren ... /
ende doorluchtichste vorst ende keyser Mathias, die eerste van die name, int eerste jaer van sijne keyserlijcke majesteyts coronatie, compareerden voer mijn Jacob de ... /
notaris publyck, bij den Hove van Hollandt geadmitteert ende voor den ondergescreven getuygen, d'eerbare Martigen Willemsdochter, weduwe van wijlen Willem Cornelis ... /
...eling, poorteresse deser stadt Delff (mijn notario ende den ondergescreven getuygen , soe sij verclaerden  seer wel bekent) wesende clouck ende gesont van lichame, gaende /
ende staende, haire redenen, verstant ende memorie seer wel gebruyckende als uyterlijck bleke, ende men anders nyet en conden bemercken, die welcke wederroupende ende /
te nyete doende bij desen alle voergaende testamenten, codicillen, uuyterste willen ende maeckingen, bij haer alleen off met yemant gemaeckt ende voer date van desen verleden, /
insonderheyt mede hairen testamente ende uuyterste wille nopende de institutie in den eygendom van hairen goederen, naer hairen afflivicheyt metten gevolgen vandien, /
legaten bij hair aleen ende int bysonder besproken, begrepen in den testament tussen hair ende hair saliger voersz. man gemackt ende voer Pieter Kettingh, indertijt notaris /
ende sekeren getuygen verleden op den 18en Augusti anno 1597tich, ende sulcx uuytgeseyt alleenlijck van de legaten bij hair ende hairen man in denselven convinctelijck /
ende tesaemen besproecken, mette naergevolchde codicillaire acte van date den 18en Juny anno 1604, denwelcken sij testatrice bij desen es laetende in hun /
geheel ende in forme deselve leggen, sonder yets derhalven off mede den voersz. codicille te veranderen als alleen van de approbatie van den voersz. testamente voer soe veel /
als deselve bij desen te nyete gedaen wert, mer vorder off anders nyet, oick met sulcken verstande dat jaire geinstiuteerde erffgenamen, mitsgaders de /
usus fructuarissen ende tochtenaren van hairen goederen gehouden sullen wesen hairen boedel te ontlasten van allen borchtochten voer henluyden off eenigen derselver geinter- /
poneert volgens den voersz. codicille, ende disponerende vorders bij desen, verclaerden sij testatrice te wesen hair testament ende uuyterste wille t'gunt hier- /
nae volcht, eerst ende alvoeren heefft sij testatice bevolen haire siel Godt den Heere Almachtich, ende hair lichaem de Christelijcke begravinge, comende ter /
dispositie van haire tijtlicke goederen, heefft sij testatrice hairen erffgenamen geinstitueert ende gemaeckt, institueert ende maeckt bij desen den kint, kinderen /
ende kintskinderen bij representatie van Willem Willem Luytssen de eene handt, de kint, kinderen ende kintskinderen bij representatie van Jan Willemssen /
voer de tweede handt, wesende beyde hairen testatrices saliger broeders soonen, insgelijx den kint, kinderen ende kintskinderen bij representatie van Aernt /
Antonissen Puffvliedt voer de darde handt, ende den kint, kinderen ende kintskinderen oick bij representatie van Jannetgen Anthonisdochter, tegenwoordige huysvrou /
van Arent Dircxz van den Bosch voer de vierden handt, wesende hair testatrices susters soone ende dochter, als elcke handt voer een gerecht vierde paert in den /
eygendom van allen den goederen diewelck sij testatrice metter doot ontruymen ende naelaten sal, geen vandien uuytgesondert, item dat voersz. Willem /
Luytssen ende Annetgen Brouckhoven, sijn tegenwoerdige huysvrou, Jan Willemssen ende Neeltgen Simonsdochter, sijn tegewoerdige huysvrou, Aernt Antonissen /
Puffvliedt ende Aechgen Jansdochter, sijn tegenwoerdige huysvrou, mitsgaders Jannetgen Anthonisdochter ende Aernt Dircxz van den Bosch, hairen tegenwoerdigen /
man, te weten man ende vrou tesaemen, off bij voer off nae-afflivicheyt van een van beyden den lanxtlevende vandien in een gerecht vierde paert van de /
tochte ende vruchtgebruyck van de voersz. goederen daerinne  heuren kint, kinderen ende kintskinderen voer den eygendom respective geinstitueert werden, /
welverstaende nochtans soe de voersz. Jan Willemssen voer de voersz. Neeltgen Simonsdochter, sijn huysvrou, off d'voersz. Jannetgen Tonisdochter voer den voersz. /
hairen tegenwoordigen man Arent Dircxz van den Bosch respective quamen afflivich te werden, dat heure tochte nyet vorder en sal strecken off getrocken /
werden als voor de portie ende deel van de kint ende kinderen dien hij Jan Willemssen bij de voersz. sijne huysvrou, off sij Jannetgen Antonisdochter bij denselven hairen /
man gewonnen hebbende, sullen comen achter te laeten, ende dat de vorder reste metten eygendom verheelt wesende, comen sal ten proeffijte van /
hueren voerkint off kinderen, off derselver descendenten, offt oick gebeurde dat t'hairder testatrices afflivicheyt d'een off d'ander van hairen /
voersz. broeder ende suster kinderen geen kint, kinderen off descendenten vandien in leven en hadden, off daernaer en gecregen in wettelijcken houwelijcke, /
off oick hebbende deselve voer hennen onder den minderjarich off ongehouwet stierven, in sulcken gevalle institueert ende substitueert sij testatrice /
den anderen hairen voersz. broeder ende suster kintkinderen bij representatie als voeren in des afflivigens portie ende erffdeel van eygendom, blijvende /
den tocht als voeren, vorders heefft sij testatrice gemaeckt ende gelegateert, maeckte ende legateert bij desen  den voersz. kint, kinderen ende kintskinderen /
van Jan Willemssen voer een darde paert den kint, kinderen ende kintskinderen van Arent Antonissen Puffvliet voer gelijcke darde part /
ende van Jannetgen Anthonisdochter voert resterende darde part in eygendom, mitsgaders hairluyder respective onderen ende lanxtlvevende vandien /
in tochte in vougen als voeren allen alsulcken lijffrenten als bij hair testatrice voer date deser onder den ontfanger Boudewijn de Man tot laste vant /
gemeen lant van Hollandt gecofft sijn ten lijven van de drie kinderen van Willem Willem Luytssen ende van de drie kinderen van Arent Tonissen Puffvliet /
tesaemen uuytbrengende vijff ende tseventich guldens s'jaers volgens de ses distincte brieven daervan sijnde, metten onbetaelde renten thande de /
testatrices overlijden verschenen ende vorde verloope van elcx vandien, ten proffijte van de voersz. usu fructuarissen ende tochtenaeren, met sulcken verstande /
nochtans wat renten vandien bij d'afflivicheyt van d'een off d'ander van der personen tot wiens lijve deselve gecofft sijn affstierven, dat t'selve /
voer een darde paert elck voersz, handt aen denwelcken die gemaeckt sijn affgaen ende consequentich elx tochte voer een darde paert affsterven ende minderen sal /
noch maeckt ende bespreeckt sij testatrice bij desen aen den kinderen van Gijsbrecht Willemssen ende den kinderen van Trijntgen Willemsdochter, haire testatrices halve susters /
soons kinderen elx bij representatie eens vijfftich guldens aen gelt, item aen Heyltgen Lenertsdochter, daer vaeder van was Lenert
Claessen van Sorgen, wesende /
een kintskint van wijlen Jan Willemssen in de kat hondert guldens eens, daermede sij wil dat deselve hun sullen contenteren ende genuegen sonder yets meer /
te connen off moegen eysschen, oick nyet uuyt crachte van voergaende testament, als oick ten dien deele bij desen wederroupen ende te nyete gedaen sijnde ende off sij testatrice hier namaels noch yets quame te maecken, legateren off bespreken, t'sij onder hair hantgescrifft off in presentie /
van twee loffwaerige geuytgen te verclaeren, allen t'selve wil sij van alsulcke cracht ende waerden te wesen alsoff in desen begrepen stonde. /
Allen t'welcke voersz. es verclaerden  sij testatrice te wesen hair testament ende uuyterste wille, d'welck sij wil volcomen ende achtervolcht te werden /
als testament, codicille off andere uuyterste wille soe t'sekve best mach bestaen, nyettegensaende eenige solemniteyten hierinne nodich /
nyet onderhouden mochten sijn, versouckende hiervan een off meer instrumenten in de alderbester forme gemaeckt te werden. Aldus gedaen ende verleden /
binnen Delff ten daege, maent, jaere, indictie ende jaere des keyserdoms als boven ten huyse mijns notary, in presentie van Joris Janssen /
Hoochwinckel, cleermaecker ende Gerhardt Michielssen Camerling, burgers, als loffwaerdige getuygen hiertoe versocht ende gebeden.
Quod attestor
J. Dassegny, notaris publicq

Wow! Fantastisch werk Geert. Ontzettend bedankt.

What a very long will, full of caveats about who would inherit what. 

very best wishes

Anne